Бу кюнледе Нальчик шахарны «Спартак» стадионунда «Урунургъа бла къорууланыргъа» (ГТО) деген физкультура-спорт комплексни хар жылдан бардырылгъан регион фестивальны экинчи кесеги бошалгъанды. Ол билим бериу организацияланы араларында ётгенди. Анга жюзден артыкъ адам къатышханды.
КъМР-ни Олимпиада резервли спорт школуну деректоруну орунбасары Заур Ошноков айтханнга кёре, фестиваль ючге бёлюнеди. Биринчиси муниципал халда бардырылады. Быйыл аны кезиуюнде онюч команда айырылгъанды, хар биринде сегиз адам. Бу жол 11-12 эм 13-15 жыллары толгъан къызчыкъла бла жашчыкъла ГТО-ну мардаларын бередиле. Ала чабышхандыла, секиргендиле, билек кючлерин сынагъандыла. Биринчилени араларында Атабийланы Алия, Отарланы Инар, Чеченланы Кантемир да болгъандыла.
Биринчи жерге чыкъгъанла сентябрьде Кърым республикада «Артек» сабий арада бырдырыллыкъ ючюнчю битеуроссей кезиуге къатышырыкъдыла.
Додуланы Мадина.
