Урунуу рынокда болумну игилендириуню  юсюнден

Россей Федерацияны Правительствосуну «2022 жылда урунуу рынокда болумну шошайтыу жаны бла талай жумушланы тамамлауну юсюнден» быйыл 18 мартда чыкъгъан 409 номерли бегимине тийишлиликде, энчи предпринимательлени бла предприятияланы эм организацияланы къырал эмда муниципал учрежденияла ары кирмейдиле) онгдурургъа оноу этилгенди, деп билдиргендиле КъМР-ни Урунуу, иш бла жалчытыу эмда адамланы социал жаны бла къоруулау арасындан.

Алай бла ол къауумлагъа киргенле этген къоранчланы бир кесеги алагъа къайтарыллыкъды. Ол санда ма бу жумушла ючюн этилгенлени:

- иш бла жалчытхан органлада эсепде тургъан гражданланы жамауат ишлеге жибергенде тёлеген хакъларыны бир кесеги;

- ишден къысталыргъа боллукъ инсанланы болжал халда иш бла жалчытханда тёленнген хакъларыны эмда мюлк-техника жаны бла къоранчланы бир кесеги. Ары жаланда аллай инсанла угъай, толу кюн ишлемегенле неда ишлери талай заман тохтап тургъанла, хакълары тёленмей отпускга жиберилгенле да киредиле;

- ишден къысталыргъа боллукъ инсанланы жангы усталыкъгъа юйретирге деп этилген ахча къоранчланы бир кесеги.

Адамларын жамауат неда болжал ишлеге жибергенлеге бир айны ичинде бериллик ахчаны ёлчеми иш хакъны эм аз ёлчеми тенгли болады. Анга район коэффициентлени эмда бюджетледен тышында къырал фондлагъа берилген страховой тёлеулени да къошадыла. Быллай халда адамны эм кёбюсю – юч айны ишлетирге боллукъду.

Адамларын жамауат эмда болжал ишлеге жибергенлеге ахчаны айырыула бардырып алай берликдиле. Анга къатышыргъа сюйгенле Арагъа барып заявление жазаргъа керекдиле.

Соруулары болгъанла КъМР-ни Урунуу, иш бла жалчытыу эмда адамланы социал жаны бла къоруулау арасына 44-07-04 номер бла сёлешсинле неда аны бёлюмлерине барсынла.

Омарланы Мурат хазырлагъанды.