Къашхатауда «Заман» газетни окъуучулары асламдыла. Алай жылдан-жылгъа, жарсыугъа, аланы саны бир кесек азая барады. Аны сылтаулары кёпдюле, аладан бири тамата тёлюню кете баргъаны, жаш адамланы уа малкъар тилни тынгылы билмегенлериди. Билгенлери уа битеу жангылыкъла интернетде болгъанла сунадыла. «Малкъар халкъ бла байламлы толу хапар интернетде жокъду. Бизни жыл сайын ненча адамыбыз илмуланы кандидатлары боладыла, не эришиуде къайсы сабийибиз алчы жер алады, къаллай жангы китап чыгъады, театрда къайсы премьера болады – газетни бетилеринде кёрюнюп турады. «Заман» газетден сора аллай тынгылы хапар малкъар халкъны юсюнден бир жерде да табыллыкъ тюйюлдю», - дейди Къашхатауда почтаны таматасы Къулбайланы Мадина. Ол бизни газетибиз миллетни бирлешдирген кюч болгъанын чертгенди. Дагъыда ол «Заманда» басмаланнган материалла орта школлада класс башчылагъа бек жарарыкъларын да белгилегенди.
- Миллет тилде чыкъгъан газетни, журналны да эллиле бек излейдиле. Сёз ючюн, «Заманда» белгили адамларыбызны юсюнден бетлени школлада сабийлени бирге жыйып нек окъургъа жарамайды? Театргъа барыргъа, газет окъургъа да юйретирге керекди, сабий кеси аллына шёндюгю жашауда къолуна газет алмазлыгъы баямды.
- Келигиз, аланы миллетни тарыхын кюн сайын басмагъа салып тургъан газетни окъургъа юйретейик! - дейди Мадина.
Аны орунбасары Къойчуланы Елена газетде кемчиликлени юслеринден да боладыла материалла, дегенди. Аланы кёрмегенле, билмегенле газет жашаудан узакъ сунадыла. Ол алай тюйюлдю. «Заманны» ишчилери таулу элледе терк-терк боладыла.
- Газетибизге хар окъуучу кесини оюмун жазаргъа болады. Мен аны къашхатаучулагъа ангылатыргъа кюрешеме, - дейди газетлеге жазылыу жаны бла специалист Гажонланы Асият.- Бек жарсыйбыз окъуучуланы саны ёсмегенине. Малкъар тилде жаланда бир газет чыгъады да, аны окъумаса да, хар таулу алып турса, хата кёрмез. Жаланда суратлагъа къарасанг окъуна, кюн сайын къаллай бир хапар билирге боллукъду!
Операторла Халум Бурниева бла Чеченланы Танзиля республикалы газетлени бек сакълагъанларын, кеслери да окъугъанларын айтхандыла.
Ушагъыбызны ахырында почтаны таматасы Къулбайланы Мадина: «Битеу таулу сабийле ана тиллерин билселе, хар таулу юйюр а ана тилде чыкъгъан газетни алса, бек аламат боллукъ эди», - дегенди.
Байсыланы Марзият.
