Бу кюнледе Россейни бла Къытайны регионла аралы эмда чекле къатларында байламлыкъла, сора энчи экономика тийреле жаны бла ишчи къауумуну кенгеши видеоконференция халда бардырылгъанды. Аны ишине РФ-ни экономиканы айнытыу министрини орунбасары Дмитрий Вольвач, Къытайны Коммерция министерствосуну Евразия Департаментини башчысы Лю Сюэсун, КъМР-ни экономиканы айнытыу министри Рахайланы Борис, министерствону регионну маркетинги эмда тыш байламлыкъла департаментини башчысы Севиль Богацкая, регионланы келечилери эм башхала къатышхандыла.

Тюбешиуде транспорт, сатыу-алыу, инвестицияла, селекция, сояны ёсдюрюу эмда жарашдырыу, Россейде бла Къытайда регионланы чыгъарыучу промышленностьлары сфералада байламлыкъла къурауну юсюнден баргъанды ушакъ. Аны эсеплерине кёре, Россейде субъектлеге тийишли рекомендацияла берилликдиле эмда бизни къыралны бла Къытайны арасында сатыу-алыу – экономика байламлыкъланы айнытыу жаны бла оноула этилликдиле, дегендиле республиканы Экономиканы айнытыу министерствосунда.

Эсге сала айтсакъ, Къытай бизни республиканы сатыу-алыу – экономика жаны бла партнёруду. Былтырны эсеплерине кёре, ол къырал бла 3943,66 минг доллар багъасына сатыу-алыу этилгенди. Республиканы импортун саулай ма ол алады.

Тёрт жыл мындан алгъа Нальчикге Къытай Халкъ Республиканы Энчи эмда Толу эркинликли Посолу Ли Хуэй келген эди. Ол мында болгъан кезиуде байламлыкъла къурауну юсюнден талай келишим этилгенди, ол санда ма быланы араларында: КъМР-ни Сатыу-алыу Палатасы бла Къытайны «Гринвуд» деген халкъла аралы сатыу-алыу – кёрмюч комплекси, КъМР-ни Курортла эмда туризм министерствосу бла «Гринвуд Тур экспо» компания (КНР), «Курорт Эльбрус» акционер общество бла «Гринвуд Тур Экспо».

Республиканы экспортха себеплик этиу Арасы, региондан гитче эмда орта предпринимательство бла кюрешгенлеге 2019 жылда Къытайда бардырылгъан SIAL China 2019 кёрмючге къатышырча жолну тёлегенди. Ол кезиуде анда «Живая вода», «Эльбрус-К», «Нальтекс» предприятияла болгъан эдиле. Татлы ашарыкъла чыгъарыучу «Эльбрус-К» фабрика уа къытайлыла бла экспорт келишим этгенди.

«Уллу чилле жол» деген регионла аралы туризм проектни тамамлауну чеклеринде Шимал Кавказны регионларыны бла Къытайны белгили туризм компанияларыны арасында Меморандум къабыл этилгенди. Къабарты-Малкъаргъа солургъа эмда саулукъларына къаратыргъа келирге сюйген къытайлы туристлеге тийишли турпрограмма жарашдырылгъанды. Бу проектни транспорт-логистика амалы да хазырды.

Бизни республикадан предприятияланы ЭКСПО-2022 кёрмючге къатышыргъа онглары болурча, РФ-ни Экономиканы айнытыу министерствосу бла шёндю оноулашыу барады. Бу кёрмючню Россей бла Къытай бирге къурагъандыла. Ол кеси да бизни къыралда ётерикди.

Улбашланы Мурат хазырлагъанды.