Белгилисича, 26 майда къыралда Россейли предпринимательствону кюню белгиленеди. Анга жоралап, Нальчик шахарны администрациясы бла «Сюйген шахарым» деген интернет-платформа «Жылны предприниматели» деген конкурсну эсеплерин чыгъаргъандыла.  
Шабат кюн а Къулийланы Къайсын атлы Малкъар къырал драма театрда аны регион кезиуюнде жетишимли болгъанланы саугъалагъандыла.  Ары тюрлю-тюрлю номинациялада хорлагъан предпринимательле чакъырылгъан эдиле. Алчыланы къауумунда «Къурулуш бизнес» деген номинацияда яникойчула Ёлмезланы юйюрню «Альмез-Строй» компаниялары да барды.
Бюгюнлюкде регионда къурулуш бизнесде кёпле ишлегенлерин эсге ала, аланы араларында айырмалы болуу, сёзсюз, жетишимди. Ёлмезланы юйюр а быллай даражагъа жетип уруннганлары къууандырады. Сахнагъа компанияны башчысы Марьям Якубовна чакъырылгъан эди. Анга саугъаны РФ-ни Машинала ишлеучюлерини союзуну КъМР-дагъы регион бёлюмюню таматасыны орунбасары Анзор Тхамоков берип, мындан ары да бет жарыкълы уруна турурларын тежегенди.
Ёлмезланы Марьям да, байрам ингирни къурагъанлагъа ыспас этип, компания ишин къачан да бет жарыкълы тамамларгъа итиннгенин айтханды.
 
Таппасханланы Аминат.