Кёп болмай Чегем районну администрациясыны башчысы Юра Борсов, орунбасары Жанкишиланы Жагъафар, эллени, предприятияланы бла организацияланы келечилери, волонтёрла да къатышып, уллу экология субботник бардырылгъанды. Аны чеклеринде Нальчикни бла Чегемни ортасында, «Северный» автовокзалны аллында жашил зона боллукъ бир гектар чакълы жерде 400-ден аслам терекчик орнатылгъанды.
Анда сора да, Чегемден ара шахарыбызны чегине дери тёрткилометрлик велосипед жолну жанлары бла да терекчикле салыннгандыла. Хар замандача, федерал трассаны жанларында ёсген тереклеге тытыр сюртюлгенди, жерге тюшген бутакъла кетерилгендиле, кырдык да чалыннганды.
Ол кюн субботник эллени барысында да ётгенди. Хар замандача, муниципал тийреле, суу жагъала, жол жанла, малла отлагъан жерле кир-кипчикден тазаланып, санитар мардалагъа келиширча этилгендиле. Учрежденияланы темир буруулары эм башха конструкциялары боялгъандыла, жашиллендириу мадар да этилгенди.
Уллу Хорламны байрамыны аллында эсгермелени тёгерек-башларын тапландырыугъа энчи эс бурулгъанды, жамауат аслам хайырланнган жерле да игилендирилгендиле.
Курданланы
Сулейман.
