КъМР-ни Башчысы Казбек Коков Лескен районда Р-217 «Кавказ» федерал жолда  къурулуш ишле къалай баргъанлары бла шагъырейленнгенди. Аны юсюнден республиканы оноучусу кесини телеграм-каналында билдиргенди.

 «Аргудандан тебиреп Шимал Осетия-Аланияны чегине дери 15, 5 километр жолгъа тынгылы ремонт этилгенини хайырындан ол тёрт автомашина бир ызгъа жюрюрча боллукъду. Ол жол федерал иеликдеди, хоншу регионла бла байламлыкъны жалчытады. Аны бла иги кесек автомашина жюрюйдю, ол себепден жолну кенгертиу къоркъуусузлукъну жалчытыргъа эм водительлеге таплыкъгъа себеплик этерикди», - деп айтылады билдириуде.

Белгиленнген участокда жол ишле быйыл башланнгандыла. Бюнюнлюкде къурулушчула асламысында жолну ол кенгертиллик жеринде кюреше турадыла.

 Республиканы оноучусу андан сора да Лескен сууну ётерге деп ишленнген кёпюрге къарагъанды. Мында шёндю тынгылы ремонт бардырыла турады, ол  тёрт автомашина бир ызгъа ётерча кенгертилликди. Жолчула кёпюрню тутхчучлугъун бегите турадыла.

 Федерал автомобиль жоллагъа тынгылы ремонт этип, аланы тёрт автомашина жюрюрча чекге дери жетдирирге деп жарашдырылгъан программагъа кёре,  Къабарты-Малкъарда къурулуш ишлени «Кавказ» Упрдор биригиу бардырады, деп билдиргендиле республиканы оноучусуну пресс-службасындан.

Битеу да 2022-2024 жыллада хайырланыргъа 27, 8 километр жол берилликди. «Бюгюнлюкде кёрген объектледен сора да Р-217 «Кавказ»  федерал автомобиль жолда Малкадан тебиреп Куба-Табагъа эм Залукокоажени бла Прогрессни арасында участокга тынгылы ремонт этилликди. Андан сора да 2024 жылгъа дери къабыл этилген программагъа тийишлиликде 13 кёпюр жангыртыллыкъды, ала бир ызгъа тёрт автомашина ётерча боллукъдула. Жылны аягъына дери Куба-Таба эм Экинчи Чегемни чеклеринде болгъан кёпюрлени ремонтлары бошаллыкъды», - деп чертгенди Казбек Коков.

Бизни корр.