Къабарты-Малкъар къырал аграр университетде «Экономика эм управление» факультетде бардырылгъан семинарда алгъаракъда МГУ-да ётген «Аграр политика: шёндюгю жолла эмда тамамларгъа себеплик этген амалла» конференцияны эсеплерин сюзгендиле. Аны ишине доцент Сафарби Пшихачев къатышхан эди. Ол анда «Цифровизация халда аграр политика: тыш къыралланы сынамлары эмда Россейде болум» докладын окъугъанды, деп билдиргендиле вузну пресс-службасындан.

Сафарби Мухамедович айтханыча, илму форумгъа Россейден, Беларусьдан, Къазахстандан жюзден артыкъ алим, бизнесмен эмда къуллукъчу къатышхан эди. Ол санда РАН-ны академиклери бла член-корреспондентлери, ВШЭ-ни аграр тинтиуле институтуну башчысы эмда МГУ-ну келечилери да бар эдиле.

Конференцияны чеклеринде къуралгъан «тёгерек-столда» тыш къыралла салгъан санкцияланы кезиуюнде ишни къалай бардырыргъа боллугъуну юсюнден хапарлагъандыла. Алимле РФ-ни власть структураларына шёндюгю аграр политика бла байламлы оюмларын туура этгендиле.

КъМКъАУ-да да анда айтылгъан затлагъа къулакъ салгъандыла. Сюзюуге профессорла Валерий Канчукоев, Нодари Модбадзе, Тогъузаланы Тахир да къатышхандыла. Ала кафедрада бардырылгъан илму-излем ишни къыралда шёндюгю болумгъа тийишдирирге оноулашхандыла.

Улбашланы Мурат.