Бахсан районда быйыл 32 мингден артыкъ гектарда урлукъ себилликди. Аны аслам кесегинде (22 минг гектар) мирзеулюк нартюх боллукъду. Дагъыда 3850 гектарда – чёплеу, 600 гектарда – будай бла арпа, жашил къудору бла татлы нартюх а – 1300 гектарда ёсдюрюллюкдюле, - дегенди районну эл мюлк, аш-азыкъ эмда жер бла байламлы халла бёлюмюню башчысы Хамидби Каскулов.

Бюгюнлюкге иш юч жюз гектардан аслам  жерде тамам этилгенди. Мюлкле урлукъла  бла толусунлай жалчытылыпдыла.  Ала  да асламысында бизни къыралда ёсдюрюлгенледиле.

Ишде 426 трактор хайырланылады. Дагъыда жюзден артыкъ комбайн, жерни сюрген, урлукъ сепген техника да бардыла. Ала бары да тап ишлейдиле.

Урлукъ себиу бла бирге, сабанлагъа суугъарыуда хайырланылгъан  арыкъланы тазалау ишни да къолгъа алгъандыла районда. Жер-жерли администрацияны, КъМР-ни Эл мюлк министерствосуну, Каббалкмелиоводхозну специалистлери аланы 118,2 - километрлик кесегин тинтип чыкъгъандыла. Бу ишни эсеплерине кёре инфраструктураны талай жерлеринде ремонт этерге кереклиси айтылгъанды.

Омарланы Мурат хазырлагъанды.