Республиканы районларында жазгъы от тюшюу эм суу кётюрюлюрюне къоркъуулу кезиуге хазырланыу къыстау барады, бу ишни МЧС энчи эсебинде тутады, деп билдиредиле ведомствону регионда Баш управлениясыны пресс-службасындан.

  Аны чегинде министерствону ишчи къаууму республиканы Лескен районунда болгъанды. Ол чыгъаргъа къоркъуу болгъан къыйын болумланы заранын кетерирге керекли инженер эм энчи техниканы халына, табийгъат эм техноген къыйын болумланы юслеринден халкъгъа билдириу системаланы бузукълукъсуз ишлеулерине, районну къоркъуусузлукъ паспортуна, документлерине, ахча эм мюлк керекле бла къалай жалчытылыннганына, норматив-право актларына къарагъанды. Тохташдырылгъаныча, бюгюнлюкде анда Лескен сууну ызын тюзетиу эм 2 километр узунлугъунда терен этиу ишле тамамланадыла, ырхыла чырмаусуз эм хата келтирмей барырча мадарла этиледиле. 

Белгилисича, Кабарты-Малкъарны тау череклери чыранла эм къарла эригенлери, жауунла аслам жаугъанлары ючюн апрельден сентябрьге дери толу боладыла. Бу болумну дайым эсепде тутар муратда 11 стационар гидропост хазырлылыкъда турадыла. Къоркъуулу кезиу алдады, кюнню халына кёре Малка, Черек, Чегем, Терк эм башха суула кётюрюлюрге боллукъдула. Озгъан жылланы сынамын эсге алсакъ, эм уллу къоркъуу  жауунла кёп жаууп, къаяладан, сыртладан ырхыла келиучюлериндеди – эллеге хата асламысында ала саладыла.

Кульчаланы Зульфия.