РФ-ни Эл мюлк министерствосуну вузларында окъугъан студентлени, аспирантланы эмда жаш алимлени арасында эм иги илму ишге Битеуроссей конкурсну биринчи кезиую Къабарты-Малкъар къырал аграр университетде ётгенди. Аны бардырыуну баш магъанасы хунерли жаш тёлюге себеплик этиу, илмуда бла чыгъармачылыкъда жетишимлени юслеринден кёплеге билдириу, окъуучуланы быллай ишлеге сейирлерин къозгъау бла байламлыды, дегендиле университетни пресс-службасында.

Конкурсда талай номинация бар эди. Ол кеси да алагъа кёре бир ненча факультетде бардырылгъанды. Сёз ючюн, «Агрохимия эмда агропочвоведение», «Бахчачылыкъ», «Эл мюлк продукцияны жарашдырыу технологияла»  агрономия бёлюмде ётгендиле. «Агроинженерия», «Транспорт-технологиялы машиналаны эм комплекслени хайырланыу», «АПК-гъа керекли машинала эм оборудование», «Электротехнологияла, электрооборудование эмда АПК-ны электрокюч бла жалчытыу» а – механизация эмда предприятияланы энергия бла жалчытыу факультетде.

Аладан сора да, студентле, аспирантла эм жаш алимле кеслерини билимлерин: табийгъатны эмда суу байлыкъланы хайырланыу, жерчилик эмда кадастр, ветеринария, зоотехния, аш-азыкъла чыгъарыу, экономика, менеджмент бёлюмледе сынаргъа онг тапхандыла. Конкурсха битеу да 92 студент эм 13 аспирант къатышханды. Аны эсеплерин жууукъ кезиуледе туура этерикдиле.

Улбашланы Мурат.