Жукъуну магъанасы айтып-айтмазча  уллу болгъанын кёпле биле да болмазла. Алай ол бек керекли затды, адамгъа къарыу береди, санларын солутады. Биз жукъуну юсюнден специалистле айтып билдирген талай шарт бла шагъырейлендирирге сюебиз.

- Жукъу жашауну узунуракъ этеди. Кюн сайын эм азындан алты сагъат жукълагъан адам жюрек-тамыр, психика эм кёп башха аурууладан кери болады. Аны болжалы хар кимге да бирча тюйюлдю, асламысында 6-9 сагъатды.

- Ол адамны ауурлугъун да тюрлендиреди. Жарты жукъулу къалгъан неда кече узунуна терк-терк уянып тургъан инсан ашха ачылады. Жукъудан тоймай къалыу адамны чархына осалды. Анга жууапха ол кортизол деген гормон чыгъарады. Быллай халда жашау этиу къоркъуулуду.

- Жукълагъан кезиуде адамны иммунитети кюч алады. Аны себепли кесекледен, тамакъ неда ёпке аурууладан къутулур ючюн жукъудан къанаргъа керекди.

- Ол адамны эсин кючлендиреди, акъылын, хунерлигин тирилтеди. Адам жукълагъанлыкъгъа, аны мыйысы ишлегенлей турады. Аны аллында кюн келген жангы информацияны тинтип, керек затны эсде къояды, керексизни уа унутады. Битеу дуниягъа тауушу чыкъгъан аллай жангы затланы адамла бир-бирде тюшлеринде кёрюп да ачадыла. Аны бла жукъу чыгъармачылыкъ итиниулюкге да себеплик этеди.

- Жукъудан тойгъан адам тири болады, мудахлыкъдан къутулады. Жангы кюн а аны къолу не тюрлю ишлеге да игирек келишеди.

Саулукълу жукъуну жорукълары

Адам жукъласа, аны хар саны да башха тюрлю ишлейди. Физиология жаны бла алып айтханда, жукъу деген ол – инсанны эси тыш дуниядан жабылып, нерва системасыны ишин жангыртыуду. Алай бла адамны аберини эсде тутхан онглары кючленедиле, жютюрек боладыла. Чархында да аслам тюрлениуле башланадыла: керексиз затла эмда жаулу клеткала, сора дагъыда стресс да азаядыла, иммунитетни кючлендирген мелатонин гормон а асламыракъ жарашдырылып тебирейди.

Тынч жукъу

1-чи кезиу. Бу халда адамны мыйысында жангы оюмла чыгъадыла. Ол жукълагъан угъай, къалкъыгъан этеди дерге боллукъду. Аны узунлугъу 5-10 минутду.

2-чи кезиу. Адамны эси саулай ёчюледи, терен жукъу башланады. Аны узунлугъу жыйырма минут чакълы болады. Бу кезиуде адам не аз да тауушну бек эшитеди, аны себепли тёшек аз-маз тепсе окъуна терк уянады.

3-чю кезиу. Ол экинчини ызындан башланады, кеси да андан эсе теренирекди. Аны кезиую 45 минут созулургъа боллукъду. Адам да тауушланы хазна эшитмейди.

4-чю кезиу. Бек терен жукъуду. Адамны уятхан бютюнда къыйынды. Жарыкъ тюшле анда кёрюнедиле, алай уяннгандан сора терк унутуладыла. Бу кезиу да 45 минут чакълы барады.

Терк жукъу

Быллай жукъуну бешинчи кезиуге санайдыла. Ол бир сагъат созулады. Анда кёрюннген тюшле эсде къаладыла. Адамны мыйысы бек тири ишлейди, санлары уа тепмейдиле.

Адам уянса, битеу кёрген тюшлерин жик-жиги бла айтыргъа боллукъду. Алай бу кезиуде кеси аллына уяннган а къыйынды.

Саулукълу жукъуну жорукълары

 1. Хар кюн сайын бир заманда жукъларгъа, кесигиз да онбир сагъатдан кеч къалмазгъа кюрешигиз. Эм игиси 8-9 сагъат солусагъыз.

2. Жукъу кече сагъат онекиден башланып, эрттенликде сагъат бешге дери созулса игиди. Узакъ ёмюрню гормону – мелатонин ма ол кезиуде асламыракъ болады.

3. Къыйын жукълай эсегиз, ингирде тышында 20-40 минут чакълы жаяу жюрюгюз. Дагъыда жатарны аллында ванныйге жылы суу алып, анга тенгиз туз, мелисса, пустырник, душица, ромашка хансладан да къошуп, ичине киригиз.

4. Жатардан аллына эки сагъат къалса, азыкъ ашамагъыз. Сютге бал къошуп ичерге боллукъду, алай кофени бла тютюнню уа унутуп къоюгъуз.

5. Жатхан отоуну терезесин жепи этип неда аз-мазгъа эшигин ачып хауасын алышыгъыз. Жукъугъа эм игиси – отоуда 18 градус жылыу болса.

6. Тёшек, жастыкъ да сизге келиширге керекдиле. Ала тапсыз болсала, жукъу дегенни унут да къой.

7. Уяннгандан сора ары-бери созулургъа, санланы тепдирирге керекди. Тышына чыгъып аз-маз чапса, онг бар эсе, бассейнде жюзсе да игиди.

Улбашланы Мурат хазырлагъанды.