КъМР-ни Башчысы Казбек Коков р-217 «Кавказ» федерал автомобиль жолну Малкадан  тебиреп Куба элге кирген жерге дери 7, 5 километр узунлугъу болгъан  участогуна къарагъанды.

Аны юсюнден Казбек Коков социальный сетьде кесини энчи бетинде айтханды. Республиканы оноучусу белгилегеннге кёре,  башда сагъынылгъан жол къурулуш объект- кёп болмай тынгылы ремонт ишле башланнган 27,8 километр  узунлугъу болгъан ючге юлешиннген участокдан бириди.

 Республика ол ишлени Упрдор «Кавказ» биригиу бардырады. Андан сора Аргудан элден тебиреп Шимал Осетия- Алания Республикагъа дери 15,4 километр жол жангыртылынады эм Ставрополь крайгъа кирген Прогресс элден тебиреп Пятигорск жанына дери 5 километр участокга ремонт этилликди.     «Аны бла «Кавказ» автомобиль жол республиканы чеклеринде тёрт машина бир ызгъа жюрюрча этилликди, жол иги да тапландырыллыкъды эм къоркъуусузлу боллукъду. Къурулуш ишле кёп болмай башланнгандыла,   аланы 2023 жылда ноябрьге бошаргъа мурат барды, болсада объектлени ол белгиленнген болжалдан алгъа тамамларгъа кюреширикбиз», - деп айтылады билдириуде.   

Андан сора республиканы Башчысы Экинчи Чегемде тынгылы ремонту бардырыла тургъан кёпюрге къарагъанды. Казбек Коков жолчула бла сёлешгенди, къурулуш майдан бла шагъырейленнгенди, аны буюрууу бла алайда эрттен, ингир автомашинала жыйылмазча болжал халда кёпюр ишленнген эди.

«Владикавказ жанына жюрюу, шёндю болжал кёпюр бла бардырылады, ол тийреледе къурулуш ишлени жылны аягъына бошаргъа мурат барды», дегенди КъМР-ни Башчысы.  Андан сора, Казбек Коков билдиргеннге кёре, энтта да эки кёпюрню ремонту башланнганды, аланы бири Куба -Таба элни чеклериндеди, экинчиси Анзорей элде Лескен сууну ётген кёпюрдю, ала экиси да кенг боллукъдула.

 КъМР-ни Башчысы Упрдор «Кавказ» биригиуге терк, тынгылы эм республика бла тохтамагъанлай байламлыкъ жюрютюп   къыйматлы ишлегенлери ючюн ырызылыгъын билдиргенди. «Иги, тап ишленнген жолла- республиканы айныууна себеплик этериклерине сёз да жокъду.  Бизни жол къурулуш ишле бла байламлы энтта да кёп  умутларыбыз бардыла, аланы толтурургъа керекбиз», - дегенди Казбек Коков, деп билдиреди КъМР-ни Башчысыны бла Правительствосуну пресс-службасы. 

Бизни корр.