Бюгюн Къабарты-Малкъарны Башчысы Казбек Коков Россейде Къутхарыучуланы кюнюн белгилеу бла байламлы ишлеге къатышханды. Ол жумушла бла байламлы республиканы оноучусу Къабарты-Малкъарны от тюшюуге къажау эм къутхарыу службасында болгъанды.
КъМР-ни Башчысы Казбек Коков эм КъМР-де Россейни МЧС-ини Баш управлениясыны таматасы Михаил Надёжин къутхарыу ишде борчларын толтура ёлгенлени эсгертмелерине гюлле салгъандыла.
Андан сора да, къууанчлы халда жангы энчи техниканы бериу бла байламлы сертификатланы юлешиу болгъанды. МЧС-де къуллукъ этгенлени Казбек Коков профессионал байрамлары бла алгъышлагъанды, аланы къыйын ишлеринде саулукъ, монглукъ эм жетишим тежегенди.
«Бизни къутхарыучула не заманда да жигитликлери бла айырмалы болгъандыла, къыйын эм къоркъуулу кезиуледе, хар заманда да кеслерини саулукъларына заран тюшерикди деп къоркъмай, болушлукъ этерге келгендиле»,- деп чертгенди республиканы оноучусу.
Михаил Надёжин белгилегеннге кёре, алагъа берилген энчи техника жашау журтлагъа от тюшгенде, аны ёчюлтюрге жарарыкъды, авария эм къутхарыу ишлени бардырыргъа, от тюшген жерлени ёчюлтген къауумну эм ол ишлени бардырыуда техника жаны бла керек затланы жерине заманында тапдырыргъа жарарыкъдыла.
От тюшгеннге къажау къутхарыу служба энчи жангы автомашинала алгъанды. Федерал бюджетни хайырындан шёндюгюлю автоцистернала эм бир энчи автомобиль, басхычлары эм адамланы къыйын болумдан чыгъарыргъа деп ишленнген энчи къутхарыу амаллары болгъан бир машина берилгенди.
Басхычы болгъан машина 30 метр бийикликде къутхарыу ишлени бардырады. Автоцистернагъа юч тоннадан тебиреп алты тоннагъа дери суу сыйынады эм 350 литр кёмюк этиучю сапын. Ол машинаны тёрт чархы да бирча тартханы себепли, аны къыйын жоллада хайырланыргъа да боллукъду. Къошакъ халда республикалы бюджетден къутхарыучулагъа деп эки энчи автомобиль алыннганды эм къыйын болумда тургъан жерде штаб орналгъан да бир машина. Жууукъ заманда жангы техника дежурствогъа салыныркъды, деп билдиргендиле республиканы оноучусуну пресс-службасындан.
