Адиля Кясова Нальчикни 14-чю номерли школуну окъуучусуду. Аны биз кёп болмай Малкъар халкъны политика репрессияланы кезиуюнде жоюлгъан адамларына аталгъан мемориал комплексинде бардырылгъан «Биз тау жырны эки къанатыбыз, Къайсын бла Алим…» деген назму конкурсда кёрген эдик. Къызчыкъ айтхылыкъ поэтлеге атагъан ёз назмусун айтханды.
Кеси айтханнга кёре, назмула окъуу – аны жашауууну бир кесегиди. Ол кёп тюрлю республикалы эм битеуроссей эришиуледе хорлап келеди. Андан тышында да, сыбызгъыда согъа биледи. Музыка школну да фортепиано жаны бла бошагъанды. Бюгюнлюкде уа кельт лирада согъаргъа юйрене турады.
Къайсынны бла Алимни юсюнден назму эришиуге уа Адиля, башхалача аланы назмуларын хазырлап къоймай, кеси жазаргъа таукелленнгенди.
- Жууаплылыкъ уллу болгъанын ангылай эдим. Ол себепден аланы юслеринден статьяланы табып, окъуп, кёп жангы шартла билгенме. Алгъадан окъуна мен назмуму къалай къурарыгъымы биле эдим. Нек дегенде ахыры тынгылы бошалмагъан чыгъармаланы къачан да сюймегенме. Ол себепден назмуну биринчи кесегинде поэтле бла толуракъ танышдырыргъа кереклисин ангылап, алай къурагъанма. Экинчи кесегинде бу эки айтхылыкъ поэтни бирикдирген Уллу Ата журт урушну эмда ёз халкъын кёчгюнчюлюкге ашыргъанларына Къайсынны жюреги къалай кюйгенини эм тенги Алим анга ол кезиуде къаллай билеклик этгенини юсюнден айтылады. Ючюнчю кесеги уа ол эки закийни шуёхлукъларына жораланнганды. Республикабызны халкъларын аланы юлгюлеринде жашаргъа чакъырама, - дейди Адиля.
Мени бюгюннгю жигитим китапланы окъургъа гитчелигинден бери сюеди. Китапланы сейир дуниясы бла аны атасы танышдыргъан эди. Сыбызгъыны бла кельт лираны нек сайлагъанса деп соргъанымда, Адиля: «Лираны юсюнден айтсакъ, мени миллетимде да болгъанды быллай инструмент 19 ёмюрге дери. Сора аны биринчи кере эшитгенимде, бир сейир сезимле туугъан эдиле. Ол мени тиниме къаршы болгъанын ангылагъанма. Анда согъаргъа да ма ол себепден юйренирге сюйгенме» - дегенди.
Бюгюнлюкде Адиля 11-чи классны окъуучусуду. Алай, ахшы белгилеге окъугъанына да къарамай, алыкъа къаллай усталыкъ сайларыгъына уа тюшюнмегенди. Анга гуманитар предметле бла бирге математика, физика да тынч бериледиле. Шёндю ол тенг къызлары бла бирге тюбеширге, жаш тёлюде болгъан жангы ызланы сюзерге сюеди. Бош заманы болгъанлай а, музыканы бла назмучулукъну дуниясын сайлайды…
Къасымланы Аминат.
