КъБР-м и Парламентым Физическэ культурэмкIэ, спортымрэ туризмэмкIэ и комитетым и жэрдэмкIэ, видеозэпыщIэныгъэ IэмалкIэ ди республикэм и санаторэ-курорт IуэхущIапIэхэм я Iуэху зытетым зыщагъэгъуэзащ депутатхэмрэ къулыкъущIэхэмрэ.
ЗэIущIэм хэтащ КъБР-м и Парламентым и УнафэщIым и къуэдзэ Къардэн Мурат, КъБР-м и Iэтащхьэмрэ Правительствэмрэ я лIыкIуэу Парламентым щыIэ ДыщэкI Мадинэ, депутатхэр, КъБР-м Курортхэмрэ туризмэмкIэ и министерствэм и лIыкIуэхэр, министерствэм деж щыIэ Жылагъуэ советым и тхьэмадэ Эндреев Борис, зыгъэпсэхупIэхэм я унафэщIхэр, КъБР-м и Парламентым деж щыIэ ЩIалэгъуалэ палатэм хэтхэр.
КъБР-м и Парламентым Физическэ культурэмкIэ, спортымрэ туризмэмкIэ и комитетым и унафэщI Бэрэгъун Арсен зэIущIэр къыщызэIуихым жиIащ къэралым и цIыхухэр узыншэн папщIэ ди республикэм и зыгъэпсэхупIэхэм къалэнышхуэ зэрагъэзащIэр.
- Къэбэрдей-Балъкъэрым зи узыншагъэр щрагъэфIакIуэ и зыгъэпсэхупIэхэр цIыхухэм Iуэхутхьэбзэ яхуэщIэныр зыубзыху хабзэм тету мэлажьэ. Совет лъэхъэнэм ди деж къеблагъэу щытащ цIыху мелуан 1,2-рэ, абыхэм я нэхъыбэм санаторэ-курорт щIыпIэрат зыщагъэпсэхур. Абы къыхэкIыу зыгъэпсэхупIэхэр лажьэу егъэжьэжыным, иджырей мардэхэм изагъэ санаторэхэр, хьэщIэщхэр ухуэным, я мыхьэнэр къэIэтыным, турист нэхъыбэ къыдэхьэхыным дыхуэлэжьэн хуейуэ къызолъытэ. Ар республикэ бюджетми хэлъхьэныгъэфI хуэхъунущ, - жиIащ Бэрэгъуным.
КъБР-м курортхэмрэ туризмэмкIэ и министрым и къалэнхэр пIалъэкIэ зыгъэзащIэ Шаваев Ислъам тепсэлъыхьащ зыгъэпсэхупIэ зэхэтхэм узыншагъэм щыкIэлъыплъ, щрагъэфIакIуэ Iуэхутхьэбзэу щащIэр зыхуэдэм, ар республикэм и социально-экономикэ зыужьыныгъэм и зы Iыхьэ ину зэрыщытым.
КъБР-м 2040 гъэ пщIондэ и социально-экономикэ зыужьыныгъэм ехьэлIа стратегие дэфтэрымрэ 2035 гъэ хъуху хэгъэгум туризмэм зыщегъэужьынымкIэ щыIэ тхылъ нэхъыщхьэмрэ къызэрыщыгъэлъэгъуамкIэ, нэхъ зэлэжьыпхъэр «Налшык» курортращ, абы хохьэ санаторэ-курорт IуэхущIапIэхэр. Ахэр 21-рэ мэхъу. Псоми зэхэту зыгъэпсэхуакIуэ 4917-рэ щIохуэ, цIыху 1700-рэ щолажьэ.
2021 гъэм и блэкIа мазибгъум ди зыгъэпсэхупIэхэм щыIащ цIыху мин 25-рэ, ар процент 47-кIэ нэхъыбэщ 2020 гъэм елъытауэ.
- Мыбдежым къэлъытапхъэщ, 2020 гъэм пандемием земыгъэубгъуным щхьэкIэ ягъэува мардэхэм къыхэкIыу, санаторэхэр мазищкIэ зэрымылэжьар. ИкIи абы къегъэлъагъуэ а IуэхущIапIэхэр коронавирус уз зэрыцIалэм дызригъэува щытыкIэ гугъум и лъэхъэнэм нэхъ хилъэфахэм зэращыщыр, - жиIащ Шаваевым.
Ар щхьэхуэу къытеувыIащ зыгъэпсэхупIэ IуэхущIапIэхэм я лэжьыгъэр къыщапщытэм гу зылъата ныкъусаныгъэхэм. Псалъэм къыдэкIуэу жыпIэмэ, Налшык и зыгъэпсэхупIэхэмрэ узыншагъэм щыкIэлъыплъ IуэхущIапIэхэмрэ федеральнэ мыхьэнэ ягъуэту УФ-м и къэрал программэхэм яхэхуакъым. Ар етIанэгъэ ягъэзэкIуэжыну я мурадщ а Iуэхур зи нэIэ щIэт къулыкъущIапIэхэм.
- КъБР-м и Правительствэмрэ «Налшык» зыгъэпсэхупIэмрэ лэжьыгъэшхуэ ирагъэкIуэкI иджыпсту къамыгъэсэбэп унэхэр зыхуей хуэгъэзэжыным, мылъку къыхэзылъхьэн къагъуэту дэтхэнэ IуэхущIапIэми зрагъэужьыным теухуауэ. Псалъэм къыдэкIуэу жыпIэмэ, «Нартан» санаторэу щытам пэши 130-рэ зиIэ иджырей зыгъэпсэхупIэ щащIыну я мурадщ, - жиIащ Шаваев Ислъам.
КъБР-м Курортхэмрэ туризмэмкIэ и министерствэм 2022 гъэм къалэн зыбжанэ къызэрыпэщылъыр къыхигъэщри, Шаваевым дыщIигъуащ а IэнатIэм зезыгъэужьыну жэрдэм зиIэ псори республикэм и мыхьэнэр къэIэтыным щыщ Iыхьэм - зыгъэпсэхупIэхэр егъэфIэкIуэным - теухуа проектхэр гъэзэщIэным къыхыхьэну.
Iуэхум теухуауэ къэпсэлъащ «Налшык» зыгъэпсэхупIэ АО-м, «Горный родник», «Маяк» санаторэхэм я унафэщIхэу Афэ Хьэсэнбий, Безрокъуэ Олег, Мамаевэ ХьэIишэт сымэ.
ЗэIущIэм щыжаIар къызэщIакъуэжу чэнджэщхэр ягъэхьэзыращ.
КъБР-м и Парламентым и пресс-IуэхущIапIэ.