Аллай ат бла Нальчикде халкъла аралы профессионал конкурс ётгенди. Бу кюнледе уа айырмалыланы къууанчлы халда саугъалау болгъанды.

Бу эришиуде кеслерини усталыкъ хунерлерин ана тилледен окъутхан устазла ачыкълайдыла. Быйыл ол онбиринчи кере къуралгъанды эмда аны КъМР-ни Жарыкъландырыу, илму эмда жаш тёлюню ишлери жаны бла министерствосу бардыргъанды.

Бу жол ана тиллени сагъынылгъан байрамы Къабарты-Малкъарда экинчи кере озгъанын да белгилерге тийишлиди. Ол даража уа бизни республикагъа  былтыр бу эришиу Шимал Осетияда бардырылгъанда, анда Нальчикни 34-чю номерли прогимназиясыны сабий садына эмда башланнган классларына жюрюгенлеге  малкъар тилден бла адабиятдан дерсле берген Ёзденланы Мадина Муратовна биринчи жер алгъаны бла байламлы берилгенди. Энди, тохташдырылгъан тёреге тийишлиликде, анда ким хорлагъаны эсге алынады.

Биринчи кере уа аллай конкурс бизде 2014 жылда озгъан эди. Аны аллында уа ол Чеченде бардырылып, Нальчикни тогъузунчу номерли мектебинден устаз Бёзюланы Саният ючюнчю оруннга, аны биргесине баргъан къабартылы къыз а биринчи жерге тийишли болгъандыла. Аны себепли (тёреге тийишлиликде) бирси регионладан анга къатышханлагъа Къабарты-Малкъар къонакъбайлыкъ этгенди эмда ол жол бизден анга къошулгъан педагог Чочайланы Анжела эсибизде хунерли, мастер-классын бир да чурумсуз берген устазча къалгъанды.

Арт кезиуде бизни таулу къызларыбыз бу эришиуге къатышханлары уа бютюнда къууандырады. Нек дегенде, жарсыугъа, бир ненча жылны анга адамыбыз къошулмай тургъанды.

Эсигизге салайыкъ, эм алгъа «Биз башхалабыз, алай эсе да, барыбыз да тенгбиз» деген конкурс Шимал Осетияны Билим бериуде ишлегенлени усталыкъларын ёсдюрген республикалы институтуну башламчылыгъы бла къуралгъанды. Кеси да «Мир моих увлечений» деген ат бла фестиваль халда аланы кеслеринде эки жылны бардырылып, ызы бла анда къайсы регионну келечиси биринчи жерге чыкъса да, экинчи жол ол республикада тюбеширча тёрени тохташдыргъандыла.

Алай эсе да, арт эки жылда да анга къатышханланы ишлерине жюри дистанцион форматда къарагъанды. Белгилисича, ол алай эпидемиология хал ючюн болгъанды. Быйыл конкурсда СКФО-ну регионларындан бла Къыбыла Осетиядан саулай да онжети устаз кёргюзтгенди усталыкъ хунерин.

Алай бла Къабарты-Малкъардан профессионал эришиуге ючеулен къатышхандыла. Аланы араларында Нальчикни экинчи номерли лицейинде малкъар тилден бла адабиятдан окъутхан Тёппеланы Ханифа Мустафаевна да барды. Ол конкурсну ючюнчю даражалы дипломанты болгъанды.

Бу жол эришиуде алчылыкъны уа къарачай эгечибиз Ёзденланы Джамиля Ансаровна алгъанды. Ол КъЧР-ни Черкесск шахарыны онтогъузунчу номерли гимназиясыны къарачай тилден бла адабиятдан устазыды. Биз аны регионла аралы профессионал конкурсда хорламы бла алгъышлайбыз эмда мындан арысында жангы жетишимле, илхам учунуулукъ да тежейбиз. Алай бла келир жыл сагъынылгъан эришиуню къонакъбайы Къарачай-Черкес Республика боллукъду эмда ана тиллени юйретген педагогла анда тюбеширикдиле.

Бу жол а экинчи жерни Шимал Осетиядан келген Залина Калоева (осетин тил) бла Дагъыстандан Саида Гусейнова (авар тил) юлешгендиле. Дагъыда бизни жерлешибиз бла бирге ючюнчю даражалы дипломгъа Ингушетия Республикадан устаз Зарема Джандигова (ингуш тил) тийишли болгъанды.

Айхай да, быллай конкурслагъа кеси миллетибизни келечилери къатышып, алада къарачай-малкъар тил да сагъынылса, эшитилсе, бирсиле бизни да ким болгъаныбызны, айтхылыкъ поэтлерибиз-жазыучуларыбыз барлыкъларын да билселе, бютюнда бег а тилибизни бюгюнлюкде жаланда айныууна угъай, сакъланып къалырына къыйын сала, ишлерин бет жарыкълы бардыргъан устазларыбызны да кёрселе, къууанабыз. Не букъдурлугъу барды, ол кезиуледе жюрегинг башха тюрлю ургъанча кёрюне, ёхтемлик сезим да бийлейди. Угъай, ол кесибизни асыры кётюрмеклик тюйюлдю, жаланда биз да, бирсилеча, халкъбыз, миллетбиз демекликди. Аны себепли бу эришиуге эндиге дери, бу жол да къатышхан къызларыбызгъа дагъыда бир кере алгъышыбыз бла бирге ыспас да этебиз.

Ана тилибизден окъутханлагъа не заманда да хурметибиз, ыразылыгъыбыз уллуду. Ала къаллай къыйын ишни кётюргенлерин ангылайбыз. Чынтты устазла эндиге дери да, бюгюнлюкде да болгъанларына ийнаннганыбызча, келир жолда боллукъ тюбешиуде да усталыкъ хунерлери бла ала дагъыда айырмалы болурла деп ышанабыз, жангы жетишимлени тежейбиз эмда сакълайбыз.

 

Трамланы Зухура.

Суратда: онг жанындан экинчи Тёппеланы Ханифа бирси регионладан устазла бла.