КъБР-м узыншагъэр хъумэнымкIэ и министр Къалэбатэ Рустам хэтащ УФ-м Узыншагъэр хъумэнымкIэ и министерствэм цIыхухэм япэ медицинэ дэIэпыкъуныгъэр щыхуащIэ IуэхущIапIэхэр зыхуей хуэгъэзэнымкIэ программэр зэрагъэзащIэм теухуауэ иригъэкIуэкIа онлайн-зэIущIэм.
Мы зэманым а программэмкIэ Къэбэрдей-Балъкъэрым и медицинэ IуэхущIапIэ 16-м лэжьыгъэхэр щрагъэкIуэкI. Зэгъэпэщыжыныгъэ Iуэхухэр и кIэм щынэблэгъащ Малкэ, ХьэтIохъущыкъуей къуажэхэм дэт амбулаторэхэм, Май къалэм щыIэ сабий поликлиникэм, Налшык дэт поликлиникэ №1-м и къудамэу Хмельницкий Б. и цIэр зезыхьэ уэрамым тетым. 2022 гъэм щIышылэ мазэм и пэщIэдзэм ахэр къызэIуахыжынущ.
Апхуэдэу зэгъэпэщыжыныгъэ лэжьыгъэхэр щокIуэкI Налшык Головком и цIэр зезыхьэ и уэрамым тет сабий поликлиникэ №1-мрэ Бахъсэн район сымаджэщым и поликлиникэ къудамэу Дыгулыбгъуей къуажэм дэтымрэ я пэшхэм. Къапщтэмэ, 2021 гъэм медицинэ IуэхущIапIэхэм щызэфIагъэкIын хуейуэ зыхуагъэувыжа къалэныр мы зэманым ирихьэлIэу гъэзэщIа хъуащ.
ЦIыхухэм япэ медицинэ дэIэпыкъуныгъэр щыхуащIэ IуэхущIапIэхэр зыхуей хуэгъэзэнымкIэ программэм хохьэ IэнатIэр зыхуэныкъуэ IэмэпсымэхэмкIэ къызэгъэпэщыныр. Апхуэдэу мы илъэсым къриубыдэу медицинэ техникэу 100-м щIигъу къащэхуащ: рентген, эндоскопие Iэмэпсымэхэр яIэрыхьащ районхэми къалэхэми щылажьэ поликлиникэхэм. ПIалъэ къыхамыгъэкIыу цIыхухэм дэIэпыкъуныгъэ щыхуащIэ IэнатIэхэм папщIэ машинэ 25-рэ къащэхуащ.
Урысей Федерацэм и щIыналъэхэм узыншагъэр хъумэнымкIэ щыIэ ведомствэхэм я унафэщIхэм Iуэхум зэрехъулIар къагъэлъэгъуа нэужь, видеоконференц жыпхъэм иту екIуэкI зэIущIэм щаубзыхуащ 2022 гъэм программэмкIэ зэфIагъэкIыну къалэнхэр. Абы ипкъ иткIэ, ди республикэм медицинэ IуэхущIапIэу 9 зыхуей щыхуагъэзэнущ, поликлиникэ нэхъ инхэм я къудамитI зэфIагъэувэжынущ, медицинэ Iэмэпсымэу 50-м щIигъурэ автомашинэ 16-рэ къащэхунущ.
ЩхьэщэмыщI Изэ.