Черекледе суу кётюрюлюрге къоркъуу кетмегени бла байламлы табийгъат къыйынлыкъдан сакъланыуну энчи низамы кийирилгендиКъМР-ни Башчысы Юрий Коков Правительствону юйюнде Элбрус районда табийгъат къыйынлыкъны хатасын кетериу жаны бла кенгеш бардыргъанды. Аны кезиуюнде адам да ачымагъанды, болсада хал къоркъуулуду, дегенди республиканы Башчысы Правительствону оноучуларына, министерстволаны бла ведомстволаны, право низамны сакълаучу органланы, къутхарыучу службаланы келечилерине. Бахсан черекде суу кётюрюлгени бла байламлы А-158 федерал жолну 12 жери бузулгъанды, тёрт кёпюрню, ток баргъан ызланы суу алып кетгенди. Терс-Къол, Байдаевка, Тегенекли элле токсуз къалгъандыла, газ ыз да бузулгъанды. Адамланы къоркъуусузлукъларын сакълар мурат бла газны азайтыргъа тюшгенди. Табийгъат къыйынлыкъланы тохтатыу, аланы хатасын кетериу эм от тюшюуден сакълау жаны бла дайымда ишлеген Правительстволу комиссия жеринде ишлейди. Бюгюнлюкде Минги тауну тийресинде тёрт мингден аслам турист барды. Юйлерине атланнганланы къоркъуусузлукъларын жалчытыу жаны бла мадарла тамамланадыла. Бузулгъан трассаланы машина ёталмагъан жерлеринден адамла жаяу барадыла. Адамланы табийгъат къыйынлыкъ болгъан жерден чыгъарыргъа керек болса деп, тёрт вертолёт хазырлыкъда турады. Медицина эм билим бериу учрежденияла чырмаусуз ишлерча, суу, аш-суу бла жалчытыуда кемчиликле болмазча битеу мадарла толтуруладыла. Юрий Коков табийгъат къыйынлыкъны хатасын кетергенлени къоркъусузлукъларын сакъларгъа кереклисине энчи эс бургъанды. «Жарсыугъа, бизни бу вопрослада сынауубуз барды»,-дегенди регионну оноучусу. Жыйылыуда Юрий Александрович районда жашагъанлагъа болушлукъ этиуню, ангылатыу ишни бардырыуну, Элбрус районну администрациясында, жууаплы министерстволада бла ведомстволада «къызыу ызны» телефонун ачыуну, республиканы череклеринде халны дайымда тинтиуню юслеринден буйрукъла бергенди. Зольск, Бахсан, Урван, Май, Черек, Терк, Прохладна районлада черекледе суу кётюрюлюрге къоркъуу сакъланнганы бла байламлы КъМР-ни Башчысыны Буйругъу бла 5 июльдан башлап республикада табийгъат къыйынлыкъладан сакъланыуну энчи низамы кийирилгенди.
Поделиться: ЧИТАТЬ ТАКЖЕ:
|