Алгъаракълада билдиргенибизча, КъМР-ни Башчысы Казбек Коковну буйругъу бла бу айны жетисинде Огъары Малкъар бла Хушто-Сырт эллеге рейсге 23-ден аслам адам сыйыннган «ПАЗ» автобусла чыкъгъандыла. Ол а адамланы тилеклери бла этилген ишди. Биз, Нальчикни 2-чи номерли автовокзалында болуп, водительлеге бла пассажирлеге тюбеп, болумну юсюнден хапар соргъанбыз.
Мамайланы Мухарбий алгъын «Сельхотехникада» шофёр болуп уруннганды. Автобусда ишлеп башлагъанлы уа жыйырма бла бир жыл болады. Биринчи кюнледен бери Огъары Малкъаргъа жюрюйдю. Аны оюмуна кёре, тау эм узакъ эллени къайсы бирине да автобус керекди. Эллилени шахаргъа анда-мында бир келгенлери себепли, ары-бери да хапчюклери бла жюрюйдюле. Аланы аз жерли пассажир транспортха сыйындырыргъа къыйынды. Ол себепден автобусланы жангыдан рейсге чыкъгъанлары эллилени бек къуундыргъанды.
Бюгюнлюкде Мухарбий бла бир эллилери да ишлейдиле. Аланы танымагъан хазна болмаз. Мисирланы Ахмадия бла Малик тау элге кёп жылланы жюрюген, сынамлары да болгъан водительледиле. Сёз ючюн, Ахмадияны стажы отуз жылдан атлайды, Малик да 1987 жылдан бери урунады.
Хушто-Сыртха жюреген автобусну шофёру уа Гамайланы Хакимди. Аны стажы да эки жыйырма жылдан атлагъанды. Автобусха олтургъанлы уа жыйырма эки жыл болады. Ары дери Тёбен Чегемде колхозда техникада ишлегенди.
- Алгъаракълада улоу жюрюмей къалгъанда, адамла бек жунчугъандыла. ГАЗель юч кере рейс этгенликге, адамла сыйынмагъандыла. Аланы биргелерине жюклери да болады. Аны жетишалмагъаныны хатасындан, дайым адамлагъа да къыйналыргъа тюшгенди,- дейди Гамай улу.
Кёп жолланы кёрген, къыйын ишден къачаргъа юйренмеген, сынамлы жаш, олтургъан машинасына бюсюрейди.
Пассажирледен бири, Тёбен Чегемде жашагъан Занкишиланы Танзиля Нальчикде ара солуу паркда кассир болуп ишлейди. Ол элге маршрутка, бирси жерлегеча, терк-терк жюрюсе бек ыразы эди. Автобус жолда алмай кетмегенин, ишге кечге къалдырмай жетдиргенин да айтханды.
Кетенчиланы Исхакъ элли жети жылдан асламны тюрлю-тюрлю жерледе уруннганды. Анга токъсан жыл толургъа кёп къалмаса да, Нальчикде дарманла, аш-азыкъ алыргъа эм башха жумушлагъа да, онгу болуп, кеси келирге сюеди. Автобус болмагъан кезиуде анга да къыйналыргъа тюшгенин айтады.
- Транспортну табылмай къалгъаны, къысха заманда анга бир оноу этилмегени бек жарсытханды. Болсада бир мадар табылгъаны игиди. Узакъ элде жашагъанла пассажир транспорт жаны бла жунчумазгъа керекдиле, бютюнда абаданла,- дейди Кетенчи улу.
Водительле Аналаны Расул, Алтууланы Хаким да жамауатны атындан бюгюнлюкде Ташлы-Талагъа бла Бызынгыгъа автобус жюрюмегенин жарсып айтхандыла. Ол борчну ал заманладача, «Ралли спорт» фирманы башха тау эллеге баргъан маршруткалары толтурадыла. Сёз ючюн, Алтууланы Хаким бусагъатда Ташлы-Талагъа жыйырма адам сыйыннган «Фольксваген» микроавтобус бла жюрюйдю. Биринчи заманлада уа автобусну жюрютгенди. Мотору кюйгенден сора, жараталмай жангы машинагъа отлургъанды. Кюннге эки рейс этсе да, ол азды. Бир-бирде адамла сыйынмагъанлары ючюн, аланы вокзалда къоюп кетерге тюшеди. Ол себепден кёпле, алагъа ышанмай, кеслери бир мадар излерге, жууукъларына, танышларыны машиналарына минип барыргъа кюрешедиле.
КъМР-ни Транспорт эмда жол мюлк министерствосунда айтханларына кёре, къыралдан субсидия болушлукъ этилсе, келир жыл жангы улоула алыр муратлыдыла. Аны чеклеринде тау эллеге жангы автобусла берирге онг табыллыкъды, ол санда Бызынгыгъа бла Ташлы-Талагъа.
Курданланы Сулейман.
