Тюнене Къабарты-Малкъар Республиканы биринчи Президенти Валерий Коковну Нальчикде къырал аграр университетни аллында орналгъан эсгертмесине гюлле салыу болгъанды. Анга РФ-ни Президентини СКФО-да толу эркинликли келечиси Юрий Чайка, КъМР-ни Башчысы Казбек Коков, Къарачай-Черкесни таматасы Темрезланы Рашид, РФ-ни Къоркъуусузлукъ Советини Секретарыны орунбасары Юрий Коков, сенатор Арсен Каноков, Парламентни депутатлары, муниципал районланы бла шахарланы башчылары къатышхандыла.
Ызы бла уа Правительствону юйюнде КъМР-ни биринчи Президенти Валерий Мухамедович туугъанлы 80-жыллыгъына аталгъан жыйылыу ётгенди. Жыйылыуну КъМР-ни Жамауат палатасыны таматасы Хазратали Бердов бардыргъанды. Биринчи сёзню ол Юрий Чайкагъа бергенди.
Кесини докладын Юрий Яковлевич РФ-ни Президенти Владимир Путинни алгъыш къагъытындан башлагъанды. Владимир Владимирович Валерий Коков къыралын, ишин да сюйген чынтты патриот болгъанын белгилегенди. «Россейге бла Къабарты-Малкъаргъа къуллукъ этиу - аны жашаууну магъанасы эдиле. Сайлай къыралгъа эмда Шимал Кавказгъа къыйын жыллада ол миллетле аралы шуёхлукъну сакълаугъа бла керексиз къаугъаланы тохтатыугъа уллу къыйын салгъанды. Аны магъанасы бюгюнлюкде да уллулай къалады. Ол эсли, хар сёзюн да сюзюп айтхан адам болгъанды. Чынтты политик эм стратег – къыралны чачылмай сакъланыууна энчи эс бёле ишлегенди. Мындан ары да республика ол сайлагъан ыздан таймай барырына ийнанама», - деп айтылады Владимир Путинни письмосунда.
Юрий Чайка, сёзню андан ары бардыра, Валерий Коковча башчыла алай кёп жокъдула, ол туугъан жерин сюйген, аны ючюн жанын окъуна берирге хазыр болгъан адам эди, деп къошханды. «Бюгюнлюкде атасыны ишин Казбек Валерьевич бардырады да, тюз оноучу, халкъы сюйгенледен болсун», - деп чертгенди.
Хазратали Бердов а 90-чы жыллада Валерий Коков бла бирге ишлерге тюшгенин айтып, ол кезиуде республикада не ишле тамамланнганларын да эсге салгъанды: ГЭС-ле ачылгъандыла, тау эллеге газ тартылгъанды, больницала, школла, маданият юйле ишленнгендиле.
- Ол 1997 жылда ол экинчи кезиуге айырылгъанда, республиканы экономика кёрюмдюлери эки кереге ёсген эдиле. Ол а ол къыйын кезиуде алай тынч борч тюйюл эди. Алай Валерий Мухамедович тюз оноу эте билгенини хайырындан экономиканы кёп бёлюмлери тынгылы айнып башлагъан эдиле. Ол заманда регион къыралны бек иги 10 субъектини къауумуна киргенди, - деп белгилегенди докладчы.
КъЧР-ни Башчысы Темрезланы Рашид Валерий Коков къоншу регионлагъа да эс бёлгенлей тургъанын чертгенди. «Ол тюз жолну белгилей билген тамата эди. Аны ауушханы саулай Шимал Кавказгъа да уллу жарсыу болгъанды. Хурметли Казбек Валерьевич! Бюгюнлюкде сиз атагъызны ишин бардырасыз да, туугъан жеригизге, халкъыгъызгъа сюймеклигигиз таркъаймасын. Анагъыз да энтта да кёп жылланы жашасын!» - дегенди Темрез улу.
КъМР-де Адамны эркинликлери жаны бла уполномоченный Зумакъулланы Борис да тенгини юсюнден кёп ариу сёз айтханды.
- Мен, Валерий Мухамедович биринчи кере республиканы башчысына айырылгъанда, бу залда ант этгенине шагъат болгъанладан бириме. Бюгюнлюкде уа манга аны юсюнден озгъан заманда сёлеше, эсгерирге тюшюп турады. Ол бушуу сезим бла бирге мени жюрегимде къууанчлы сезим да жашайды, аллай адам бла шуёхлукъ жюрютгеним бла ёхтемленеме. Аны тенглеринден бири болгъаным ючюн къадарыма ыразыма,- дегенди Борис Мустафаевич.
Жыйылыуну ахырында Казбек Коков сёлешгенди. Бек биринчиден, ол Владимир Путиннге алгъыш къагъыты ючюн ыразылыгъын билдиргенди. Юрий Чайкагъа бла Темрезланы Рашидге да аны атасына хурмет этип келгенлери ючюн ыспас этгенди.
- Быллай жылыулу эсгериулеригиз ючюн сау болугъуз. Ол бек багъалыды манга. Республика бюгюн абаданла сызлагъан ыздан таймай барады. Хар тамата да аны айныууна уллу къыйын салгъандыла. Валерий Коков Россей айныса, аны республикасы да айнырына ийнана эди да, бюгюнлюкде ол муратла толгъандыла. Къыралыбыз дунияда бек деменгилиледен бириди. Мындан ары мен да къыралыбызны, республикабызны да тамблагъы кюнлери жарыкъ эм жетишимли болур ючюн къолумдан келгенни аярыкъ тюйюлме. Керек болса уа, жанымы берирге да хазырма, - дегенди Казбек Валерьевич.
Таппасханланы Аминат.
