Гъэрэ щIырэ щызэхэкIырЦIыхуцIэ зиIэм къигъэщIа хъугъуэфIыгъуэхэм хабжэ Куэд щIакъым гъэрэ щIырэ щызэхэкIым иращIэкI мафIащхьэтыхьыр зэрызэфIэкIрэ. АбыкIэ згъэзэжын хуей щIэхъуам щхьэусыгъуитI иIэщ. Япэрауэ, ди сабиигъуэр тхуэзыгъэдахэу щыта махуэм епха Iуэхухэр ящыгъупщэнукъым ахэр зи нэгу щIэту къэхъуахэм: щхьэфIэпхыкI, кIэпхын щIэрыпсхэр шумэданхэм къыдахауэ зыкъизыхыу пщафIэ нанэхэр, абыхэм ядэIэпыкъу нысэхэр. МафIэдз Сарэбий зэритхымкIэ, гъэрэ щIырэ щызэхэкI махуэ закъуэращ унагъуэм ис псори зы пэшым щIэсу, ауэ Iэнэ зыбжанэм бгъэдэсу щышхэр. Жьэгу мафIэр зыхуэблэхэр зэгъусэн хуейуэ къалъытэу къыщIэкIынт. ЦIыхухэр хъуэхъуакIуэ къыщежьэр етIуанэ махуэрат. Я хъуэхъуэкIэми зы гъэщIэгъуэну хэлът. Унагъуэм имыIэм, ауэ зыщIэхъупсым щхьэкIэ лъаIуэ хуэдэу защIырт, псалъэм папщIэ, уи выр къызэптатэмэ, уи щIалэ цIыкIур нысхуэбгъэ- кIуатэмэ, жаIэу. «СиIатэмэ, фи хьэтыр слъагъунт», - къыжезыIэм ехъуэхъун щIадзэрт зыщIэхъуэпсыр къехъулIэну. Иужьрей илъэситIым коронавирусыр щхьэусыгъуэ хъуауэ цIыхухэр зэхыхьэжыфыркъым, армыхъумэ къуажэ-къуажэкIэ мы махуэр щагъэлъапIэ хъужат. Узри тщхьэщыкIауэ, ди нэхъыжьхэм къытхуагъэна хабзэ дахэм дызэхишэу тлъагъужынущ Iэмал имыIэу: гъащIэр фIы защIэуи Iей защIэуи зэхэлъкъым. Мы хабзэр дгъэкIуэд щIэмыхъунращ гъэрэ щIырэ щызэхэкIым епха Iуэхухэм сахуеплъэкIыжыным етIуанэ щхьэусыгъуэ хуэхъуар. ЮНЕСКО-м цIыхуцIэ зиIэм къигъэщIа фIыгъуэм хитхащ Гъэрэ ЩIырэ щызэхэкI махуэр - гъатхэпэм и 21-р. Ар къыщыхъуар 2009 гъэращ. «Навруз» махуэр ехьэжьауэ, хамэ щIыпIэхэм къикIа хьэщIэхэр, зыплъыхьакIуэхэр куэду къахуэкIуауэ щагъэлъапIэ Азие Курытым, Азербайджаным, Ираным, Афганистаным, Македонием, Албанием, Тыркум, нэгъуэщI къэралхэми. ХьэщIэм къахуэтIэтын ерыскъыи, зыхэдгъэплъэн дахагъи, едгъэлъагъун хабзи щыдиIэкIэ, дэри ар щIэдгъэужьы-хын щхьэусыгъуэ щыIэкъым.
Поделиться: ЧИТАТЬ ТАКЖЕ:
|