Хасаньяны 16-чы номерли школунда бу мектепни бошагъан полицияны подполковниги Солтанланы Аскерни жашы Вадимге аталгъан мемориал къанганы ачыу болгъанды. Ол  2011 жылда аманлыкъчыланы къолларындан жоюлгъанды.
Ол кюн ары Вадимни биргесине кёп жылланы ишлегенле, жууукълары, эллиле  да келгендиле. Аланы араларында экстремизге къажау кюреш бардыргъан «Э» араны бёлюмюню таматасы, полицияны полковниги Игорь Верховецкий, Нальчик шахарны билим бериу департаментини баш специалисти Мадина Жирикова, Маданият управленияны таматасыны къуллугъун толтургъан Лариса Кузнецова да бар эдиле. Вадимни анасы Къундуз, юйдегиси Бэлла эм къызчыкълары Айна бла София да терен мудахлыкъда сюелгендиле.
Жыйылыуну школчула кишиликни бла жигитликни юсюнден назмула бла ачхандыла. Ызы бла сёз устаз, милицияны отставкада подполковниги Кючмезланы Абдул-Муталифге берилгенди. «Элибизден кёп айтхылыкъ эм жигит адамла чыкъгъанларын барыбыз да билебиз. Бюгюн да, аладан бири Солтанланы Вадимге хурмет эте, бу къанганы ачабыз. Аллай жашла иш юсюнде чыныгъадыла. Сайлагъан ызларындан таймай къуллукъ этедиле. Аманлыкъчылагъа къажау сюеле билирге да, сёзсюз, кюч керекди. Солтан улу уа аллай ётгюр жашладан болгъанды», -деп белгилегенди ол.
Полковник Игорь Верховецкий да бу огъурлу жумушну къурагъанлагъа ыразылыгъын билдиргенди. «Баш управленияны энчи къауумуну атындан ыспас этеме. Вадимча жашланы унутургъа жарамайды. Биз эсгерген къадарда, аланы атлары сакъланырла», - дегенди ол.
Солтанланы юйюрню атындан ыразылыкъ сёзле бла Холамханланы Залим бла Мокъаланы Расул сёлешгендиле. Ала Вадимни абаданлагъа не заманда да намыс этиуюн энчи белгилегендиле. Анасына, ыннасына, кимге да ол жаланда ариу сёз айтхандан башха, бир тюрлю зат бла жюреклерин къыйнамагъанын чертгендиле. Дагъыда аны халал жюрегин школда окъутхан устазлары да белгилегендиле. Ызы бла мемориал къанганы ачыу эм, Вадимни эсгере, бир минут шош туруу болгъанды.
Эсигизге салайыкъ, Солтанланы Вадим 2016 жылда РФ-ни Президенти Владимир Путинни Указы бла, къыралда биринчи болуп (ёлгенден сора) «За заслуги перед Отечеством» орденни IV даражалысы бла саугъаланнганды. Аны подполковникни юйдегиси Бэллагъа  генерал-полковник Сергей Ченчик берген эди.