КъМР-ни Башчысы Казбек Коков ич ишле министр Василий Павлов бла «Къоркъуусуз республика» комплекс къалай ишлегени бла шагъырейленнгендиле. Ол Транспорт эм жол мюлк министерствону жууаплылыгъында болгъанын белгилерчады. Къонакълагъа комплексни ишини юсюнден аны башчысы Артур Тлехугов айтханды.
Республиканы оноучусу инсанладан асламында къаллай соруула келгенлерин, ала къалай сюзюлгенлерин билирге сюйгенди. Операторланы айтханларына кёре, адамла полициячыланы, терк медицина болушлукъну чакъырадыла, коммунал мюлкде аварияланы юслеринден билдиредиле. «Къоркъуусуз республикада» ишлегенле битеу шартланы жууаплы органлагъа белгили этедиле, керек болса, видеокамералада жазылгъанны тинтип, ачыкъланнганны право низамны сакълаучулагъа бередиле.
Тюбешиуде сёз комплексни ишин андан ары жалчытыуну юсюнден баргъанды. Казбек Коков бюгюнлюкде къоркъуусузлукъну соруулары энчи магъаналы болгъанларын чертгенди. Аны себепли «Къоркъуусуз республика» кесини борчларын бийик даражада, муниципал, толтуруучу эм право низамны сакълаучу органла бла къаты байламлыкъда тамаларгъа керекди.
Бюгюнлюкде уа бу комплекс Шимал-Кавказ федерал округда уллуладан бириди. Анга жолда жюрюуню жорукъларына бузукълукъланы эсепге алгъан 136 видео-фото система киредиле. Адамла кёп жыйылгъан жерледе 600 видеокамера салыннганды. «Къоркъуусуз республика» жолда жюрюуге 566 минг бузукълукъ этилгенин эсепге алгъанды. Аны онгларыны болушлугъу бла 40 аманлыкъ ачыкъланнганды. Ол а 2019 жылда болгъан тарихледен 60 процентге асламды.
112-система уа республикада ахыргъы сынауладан ётеди. Ызы бла ол промышленный халда хайырланыргъа берилликди. 2020 жылда 112-системагъа КъМР-де МВД, РФ-ни МЧС-ни Баш управлениясы, Саулукъ сакълау министерство, Эра-ГЛОНАСС къошулгъандыла. Адамладан келген билдириулени тинтирге 225 адам юйретилгенди.
Былтыр 112-системагъа 300 мингден аслам билдириу этилгенди, аладан 38 минги энчи службаланы болушлугъу керек болгъаныны юсюнден.