КъБР-м и Парламентым и УнафэщI Егоровэ ­Татьянэ иригъэкIуэкIащ республикэм и хабзэубзыху орган нэхъыщхьэм и Президиумым и зэIущIэр. Видеоконференц мардэм тету депутатхэр хэплъащ республикэ, къэрал законопроект зыбжанэм.
Абыхэм ящыщщ КъБР-м и «Къэбэрдей-Балъкъэр Республикэм Административнэ хабзэншагъэхэм ятеухуа и кодексыр» законым и проектыр.
КъБР-м и Парламентым Жылагъуэ шынагъуэншагъэмкIэ, Iулъхьэм пэщIэтынымкIэ и комитетым и унафэщIым и къуэдзэ Есэнкъул Ахьмэд жиIащ а законопроектым муниципальнэ зэгухьэныгъэм и дамыгъэм пщIэ хуэзымыщIым административнэ жэуап ирагъэхь хъуну - административнэ къуэды тралъхьэну къызэрыхилъхьэр.
ЗэIущIэм щытепсэлъыхьащ КъБР-м и Парламентым 2021 гъэм и гъатхэ сессием зыщыхэплъэну Iуэхугъуэ нэхъыщхьэхэм я проектым.
Егоровэ Татьянэ Парламентым а Iуэхур зэхьэлIа и ­комитетхэм пщэрылъ ящищIащ абы и кIэм нэсу елэжьыжыну икIи хуащIа дагъуэхэмрэ щIыгъужыныгъэхэмрэ къэлъытауэ, 2020 гъэм дыгъэгъазэм и 24-м КъБР-м и Парламентым иригъэкIуэкIыну зэIущIэм щыхэплъэн хуэдэу къыхалъхьэну.
- Щхьэусыгъуэ нэрылъагъухэм къыхэкIыу мы сессием дызыхэмыплъэфа Iуэху псори къыкIэлъыкIуэ сессием дгъэIэпхъуащ. Мыбдежым къыщыхэзгъэщынут: дэ иджыри тщIэркъым гъатхэ сессием деж щыIэну щытыкIэр зыхуэдэнур, абы къыхэкIыуи Iуэху гуэрхэм дызэрыхэплъэну щIыкIэхэм зэхъуэкIыныгъэхэр хэтлъхьэжынкIэ хъунущ. Ар законхэм я проектхэм дызэрелэжьынуми ехьэлIащ – си гугъэмкIэ, ахэр ­нэхъыбэ хъунущ», - къыхигъэщащ КъБР-м и Парламентым и УнафэщIым.
Апхуэдэуи депутатхэр хэплъащ УФ-м и муниципальнэ къулыкъум, цIыхухэм я узыншагъэр хъумэным и лъабжьэхэм, УФ-м Административнэ хабзэншагъэхэм ­ятеухуа и кодексымрэ УФ-м и Лэжьыгъэ кодексымрэ ехьэлIа федеральнэ законхэм я проектхэм.