Куэдым яцIыху актёрхэу Кулиев Алимрэ Жэман Iэминэрэ иджыблагъэ спектакль гъэщIэгъуэн ягъэуващ. Stephanie Feury Studio Theatre камернэ пэш иным абыхэм утыку къыщрахьащ «ЛIэныгъэм зэпэIэщIэ дищIыху» фIэщыгъэм щIэт теплъэгъуэ. Абы и режиссёрри продюсерри Алимщ, спектаклыр ди зэманым хуэкIуэу зыгъэхьэзырар Iэминэщ.
Я хъыбар зэрыщIэми, Кулиев Алимрэ Жэман Iэминэрэ зэи зэрихьэлIатэкъым. ФейсбукымкIэ зэрыцIыхуу, я мурадхэмкIэ зэдэгуэша иужькIэ, тегушхуэри спектаклым елэжьын щIадзащ, репетицэхэр Skype-кIэ ящIащ. ИтIанэ мазэкIэ Лос-Анджелес зыщагъэсащ. А тIум я закъуэ фIэкIа спектаклым зэрыхэмытым куэдкIэ тынш ищIырт Iуэхур.
МахуитIкIэ ягъэлъэгъуа спектаклым цIыхур пэшым щIэзу къекIуэлIащ. Абыхэм хуаIэта Iэгуауэ иным гурыIуэгъуэ ищIырт ягу зэрыдыхьар. Ди лъахэгъухэм жаIэ я спектаклыр мы гъэм Америкэм и Штат Зэгуэтхэм и щIыпIэ зыбжанэм щагъэлъэгъуэну, театр фестиваль зэмылIэужьыгъуэхэм утыку къыщрахьэну зэрамурадыр. Абыхэм къыхагъэщ я лэжьыгъэр Къэбэрдей-Балъкъэрми щагъэлъэгъуэну зэрыщIэхъуэпсыр, ауэ Москва е Налшык нэхърэ Голливудым уи IэдакъэщIэкIыр утыку къыщипхьэныр куэдкIэ нэхъ зэрытыншыр, сомкIи нэхъ пуду укъызэрикIыр дыщIагъуж. А лъэпощхьэпохэм илъахъэр куэдщ.
«Сэ сызэреплъымкIэ, дэ тIум ди лэжьыгъэр ди зэфIэкIым и закъуэкъым зи щыхьэтыр, атIэ ижь-ижьыж лъандэрэ адыгэхэмрэ балъкъэрхэмрэ яку дэлъ зэныбжьэгъугъэ быдэм и щапхъэщ. Ар Голливудым дызэрыщаIэтам нэхърэ куэдкIэ нэхъ лъапIэу къысщохъу», - жеIэ Жэман Iэминэ.
Кулиев Алим Америкэм и Штат Зэгуэтхэм иджы спектакль етIуанэ щегъэув - ипэкIэ спектакль зыбжанэм актёру щыджэгуащ. Абы жеIэ ди республикэм нэгъабэ къыщыхъуа лъэпкъ зэпэщIэувэныгъэм а спектаклыр игъэувынымкIэ зэрытригъэгушхуар. Iэминэрэ езымрэ я творческэ зэдэлэжьэныгъэр куэдым щапхъэ яхуэхъуну зэрыщыгугъыр. «Сэ фIыуэ къызгуроIуэ дунейр, цIыхухэр, къэрал системэр зэрысхуэмыхъуэжынур. Сэ схуэщIэнуращи, щапхъэ согъэлъагъуэ, цIыхухэр дахагъэм дызогъэхьэх. Ди республикэм дежкIэ мыхьэнэшхуэ иIэщ адыгэхэмрэ балъкъэрхэмрэ зэгурыIуэныгъэ яку дэлъу зэдэпсэуным».
Алимрэ Iэминэрэ дохъуэхъу я зэфIэкIыр нэхъыбэ хъуну. Утыку инхэм я цIэ щыжаIэу, къызыхэкIа лъэпкъхэр иджыри куэдрэ ягъэгушхуэну ди гуапэщ.