КъБР-м и Правительствэм хэтхэр фокIадэм и 28-м яIущIащ Тулэ областым и Правительствэм и УнафэщIым и къуэ- дзэ - мэкъумэш хозяйствэмкIэ и министр Миляев Дмитрий зи пашэ лIыкIуэхэм. ЗэIущIэм хэтащ республикэ унафэщIхэмрэ республикэм и сату-промышленнэ Iуэхухэм елэжьхэмрэ.
ЗэIущIэр къыщызэIуихым, Мусуков Алий жиIащ лэжьыгъэ IуэхукIэ иджы япэу Тулэ щIыналъэм къикIахэр къазэрыхуеблэгъар.
- Урысейм экономикэ и лъэныкъуэкIэ нэхъ зызыужьа и щIыналъэхэм ящыщщ Тулэ областыр. Псом хуэмыдэу ар лъэщщ промышленностым къыщIигъэкIымкIэ, - жиIащ Мусуковым. - Апхуэдэуи къыхэгъэщыпхъэщ иужьрей илъэситIым къриубыдэу щIыпIэм зезыгъэужьыну инвестицэ IуэхухэмкIэ абы ехъулIэныгъэфIхэр зэриIэр. Апхуэдэ щIыналъэм Къэбэрдей-Балъкъэрыр сыт зэрыдэлэжьэфынур жыпIэмэ, ар мэкъумэш IэнатIэмкIэ, промышленностымкIэ, уеблэмэ туризмэмрэ зыгъэпсэхупIэхэмрэ зэрызаужьынымкIэ зэфIэкI дызэриIэрщ.
Мусуков Алий къыхигъэщащ Къэбэрдей-Балъкъэрым и экономикэр къэзыIэт унэтIыныгъэ нэхъыщхьэхэм мэкъумэш хозяйствэр зэращыщыр, къапщтэмэ валовэ щIыналъэ продуктым и Iыхьэ щанэр абы къызэрызэригъэпэщыр. Апхуэдэуи Правительствэм и УнафэщIым дыщIигъуащ республикэм и промышленнэ IуэхущIапIэ зыбжанэ Урысейм щыпашэхэм зэращыщыр. Абыхэм налмэсым къыхэщIыкIа Iэмэпсымэ зэмылIэужьыгъуэхэр къыщIагъэкI, радиолектроникэ хьэпшыпхэр, медицинэ техникэ нэхъ гугъухэр, светодиод зыхэлъ светофорхэр, нэгъуэщI куэди ящI.
- Мы зэманым Къэбэрдей-Балъкъэрым и промышленнэ IуэхущIапIэхэм Тулэ областым ирагъашэ къыщIагъэкI рентген Iэмэпсымэхэмрэ кабель кIапсэхэмрэ. Дэ дыхьэзырщ абы и хьэрычэтыщIэхэми дадэлэжьэну, псом хуэмыдэу зыгъэпсэхупIэхэр, узыншагъэр щрагъэфIакIуэ центрхэр а щIыналъэм щыухуэнымкIэ, мэкъумэшхэкIхэр щахъумэ IуэхущIапIэхэм я лэжьыгъэр зэтеублэнымкIэ, - жиIащ республикэ унафэщIым. - Къыхэзгъэщыну сыхуейт, дэтхэнэ щIыналъэми дежкIэ нэхъыщхьэр абы зегъэужьыным ахъшэ хэзылъхьэфынухэр къызэрыришэлIэн Iэмалхэр зэрыарар. Къэбгъэлъагъуэмэ, иужьрей илъэсищым къызэрапщытамкIэ, Къэбэрдей-Балъкъэрыр яхыхьащ Урысей Федерацэм и щIыналъэхэм ящыщу инвестицэ Iуэхухэм зыщызыужьа нэхъыфIи 10-м. Абы къыхэкIыу мэкъумэш хозяйствэм, промышленностым, туризмэм епхауэ инвестицэ проекти 5 Тулэ областым къыхуэдгъэлъэгъуэфынущ. Сыщогугъ купщIафIэу дызэдэлэжьэну.
Тулэ областым и Правительствэм и УнафэщIым и къуэдзэ - мэкъумэш хозяйствэмкIэ и министр Миляев Дмитрий бысым- хэм фIыщIэ яхуищIащ къызэрырагъэблэгъам папщIэ. «Ди гуапэщ нэхъ гъунэгъуу Къэбэрдей-Балъкъэрыр къызэрытцIыхуар. Ди гупым хэтщ хьэрычэт Iуэхум, узыншагъэр хъумэным, туризмэм, нэгъуэщI IэнатIэхэми щылажьэхэр. Си гугъэмкIэ, ди щIыналъэхэр сыт хуэдэ унэтIыныгъэкIи дызэдэлэжьэфынущ. Зэдгъэлъэгъуащ Налшык къалэм дэт Сабий творчествэмкIэ «Дыгъэпс къалэ» академиемрэ Перинатальнэ центрымрэ икIи жысIэфынущ ахэр зэрыдгъэщIэгъуар. СызэреплъымкIэ, лъэныкъуитIми ди къалэн нэхъыщхьэр щIыналъэхэм я социально-экономикэ зыужьыныгъэр зэредгъэфIэкIуэнырщи, абы дегугъунущ», - жиIащ Миляевым.
ХьэщIэхэр ирагъэплъащ Къэбэрдей-Балъкъэрым щызэфIагъэкI инвестицэ Iуэхухэм теухуауэ ягъэхьэзыра видео кIэщIым. Абы и ужькIэ, КъБР-м и Правительствэм и УнафэщIым и япэ къуэдзэ - мэкъумэш хозяйствэмкIэ и министр Говоров Сергей щхьэхуэу тепсэлъыхьащ Къэбэрдей-Балъкъэрым мэкъумэшыщIэм зэрыщызрагъэужь Iэмалхэм. Абы жиIащ 2017 гъэм а IэнатIэм сом мелард 46,2-рэ и уасэ къызэрыщIигъэкIар, ар 2014 гъэм елъытауэ процент 13-кIэ зэрынэхъыбэр. Апхуэдэуи къэпсэлъам къыхигъэщащ илъэситI хъуауэ гъавэу тонн зы мелуаным щIигъу къызэрытрахыр. Абы дыщIигъуащ жыг хадэ гъэкIынми республикэр зэрехъулIэр.
Тулэ областым и Сату-промышленнэ палатэм и унафэщI Агафонов Юрий жиIащ Къэбэрдей-Балъкъэрым къыщыщIагъэкI Iэмэпсымэхэр гъэщIэгъуэн зэращыхъуар, апхуэдэуи нартыху гъэкIыным ехьэлIауэ я зэфIэкIхэмкIэ зэхъуэжэну зэрагуапэр. Абы къыхигъэщащ я щIыпIэм нартыхур зэрырагъэшэнум теухуауэ зэгурыIуэныгъэ зэрыщыIэр.
Тулэ областым узыншагъэр хъумэнымкIэ и министр Третьяков Андрей къыхигъэщащ я губернатор Дюмин Алексей пщэрылъ къыщищIу, Къэбэрдей-Балъкъэрым и Республикэ сабий клиникэ сымаджэщым папщIэ медицинэ Iэмэпсымэ къызэращэхуну сертификат къызэригъэхьар, ар и гуапэу бысымхэм зэраритыр.
Мусуков Алий абы фIыщIэ хуищIащ, тыгъэ лъапIэ къызэрыхуащIар къыхигъэщу. «ЗэрыжысIащи, икъукIэ лъэныкъуэ куэдкIэ ди щIыналъэхэр зэпыпщIэфынущ. Къапщтэмэ, ди республикэмрэ Тулэ областым-рэ зэрызэдэлэжьэнум теухуауэ мы гъэм Сочэ къалэм Iэ зэрыщыщIэддзрэ унэтIыныгъэ куэдым зэгъусэу зедгъэужьыну Iэмал дызэриIэр нэрылъагъу хъуащ», - жиIащ Правительствэм и УнафэщIым.