Адыгланы - (черкеслилени) кюнюнде Нальчикде Келишиулюкню майданында «Къабарты-Малкъарны миллетлерини палитрасы» деген иш къуралгъанды. Анда республикада жашагъан халкъланы культура аралары арбазла къурап, тёрелерини, халкъ чыгъармачылыкъларыны, аш-азыкъларыны кёрмючлерин  бардыргъандыла. КъМР-ни Башчысы Юрий Коков, премьер-министр Мусукланы Алий, баш федерал инспектор Владимир Канунников аланы татыуларын кёргендиле эмда жыйылгъанланы байрам бла алгъышлагъандыла.
Майданнга келгинчи уа республиканы оноучулары Правительствону юйюню аллында бу къууанчха тыш къыралладан келген делегацияланы келечилери  бла тюбешгенди. Аланы  Черкеслилени халкъла аралы ассоциациясыны таматасы Хаути Сохроков ашыргъанды. Былайда болгъан ушакъны кезиуюнде сёз адет-тёрелени, миллет тилни сакълауну, ёсюп келген  тёлюню туугъан журтубузгъа сюймекликге юйретиуню юслеринден баргъанды.
Келишиулюкню майданында байрамгъа келгенле  уа таулуланы, оруслуланы, къабартылыланы, осетинлилени, татарлыланы, грузинлилени, эрменлилени, чюйютлюлени, корейлилени, абхазлыланы, белорусланы, украинлыланы, тюрклю месхетинлилени, азербайджанлыланы, эстонлуланы, терк-малка къазакъланы миллет энчиликлери, кийимлери, къол усталарыны чыгъармалары бла шагъырейленирге онг тапхандыла. Болсада кёрмючледе баш жерни миллет аш-азыкъла, суусапла алгъандыла.
Юрий Коков хар арбазда болуп, ашла къалай хазырланнганларын соргъанды, татыуларын да кёргенди. Малкъар халкъны кёрмючюне жууукълаша,  хычинлени бек сюйгенин айтып, аланы кёп тюрлюлюклерине сейир этгенди. Терк къазакъла уа къонакълагъа «Любо!» деген сёз  эм жырла бла тюбегендиле. Чюйютлюлени кёрмючюнде Юрий Александрович маца къалай хазырланнганын соргъанды, эрменлиледе бастурманы кёргенди.
  Хар арбазда да республиканы оноучусу миллет араланы келечилерине къууанчха къатышханлары ючюн ыразылыгъын билдиргенди эмда республикада жашагъан халкъланы араларында шуёхлукъну сакълауну магъанасыны юсюнден айтханды.
Байрамгъа келгенлеге уа концерт программа да хазырланнган эди. Республикада атлары айтылгъан артистле, жаш жырчыла да ариу ауазлары бла  жыйылгъанланы кёллерин алгъандыла.