КъБР-м и Парламентым ЕгъэджэныгъэмкIэ, щIэныгъэмкIэ, щIалэгъуалэм я IуэхухэмкIэ и комитетым и зи чэзу зэIущIэр къыщызэригъэпэщащ Прохладнэ муниципальнэ районым хиубыдэ Заречнэ къуажэм и еджапIэм. Ар теухуауэ щытащ сабий бжыгъэу мащIэ фIэкIа зыщIэмыс классхэр зиIэ школхэм я лэжьэкIэм. ЗэIущIэм хэтащ КъБР-м и Парламентым и депутатхэр, министерствэхэм, ведомствэхэм, щIыпIэ унафэр зезыгъакIуэ органхэм я лIыкIуэхэр.
ЗэIущIэм щIидзэн ипэкIэ парламентархэмрэ кърагъэблэгъа хьэщIэхэмрэ Малакановскэ, Дальнэ къуажэхэм я школхэм щыIащ, абыхэм я лэжьэкIэм щы- гъуазэ защIащ, педагогхэмрэ сабийхэмрэ епсэлъащ.
ЗэIущIэр къыщызэIуихым мы Iуэхур езыгъэжьа комитетым и унафэщI Емуз Нинэ жиIащ:
-Къуажэ мыиным къыщалъхуами, къалэшхуэм дэсми, дэтхэнэ зы сабийми еджэнымкIэ Iэмал псори иIэн хуейщ. Иджыпсту къуажэ школ мыинхэм е къалэ еджапIэхэм лэжьыгъэр щегъэкIуэкIынымкIэ стандарт щхьэхуэхэр щыIэкъым. Стандартыр зыщ - сабийхэм щIэныгъэрэ гъэсэныгъэрэ егъэгъуэтынырщ.
Комитетым и унафэщIым къыхигъэщхьэхукIащ къызэрыгуэкI школхэм елъытауэ сабий бжыгъэ мащIэ фIэкIа зыщIэ-мыс классхэр здэщыIэ школхэм ефIэкIыныгъэ ин зэраIэр. Ар егъэджакIуэр дэтхэнэ еджакIуэми щхьэхуэу дэлэжьэну Iэмал зэригъуэтырщ.
Прохладнэ муниципальнэ районым и Iэтащхьэ Журавлёв Андрей КъБР-м и Парламентым егъэджэныгъэмкIэ, щIэныгъэмкIэ, щIалэгъуалэм я IуэхухэмкIэ и комитетым хэтхэм фIыщIэ яхуищIащ мы зэIущIэр къуажэм щрагъэкIуэкIыну зэрытраухуам папщIэ. Абы къыхигъэщхьэхукIащ лэжьэн и лъэныкъуэкIэ яIэ IэмалхэмкIи, школхэр зыхуей-зыхуэфIхэр къызэрызэгъэпэщамкIи еджапIэхэм зэщхьэщыкIыныгъэ щыIэ зэрымыхъунур.
Зэпкърах Iуэхум теухуауэ къызэхуэсахэм я пащхьэ доклад щищIащ КъБР-м цIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и минист- рым и къуэдзэ ШэнтIыкъу Иринэ. Абы зэрыжиIамкIэ, еджакIуэхэр ирикъуу зыщIэмыс (класс зыбжанэ зэхэдзауэ щрагъаджэ) школ мыину КъБР-м 32-рэ щолажьэ икIи абыхэм сабийуэ 3042-рэ йокIуалIэ. Школ мыинхэм щолажьэ педагог 560-рэ.
Муниципалитет зэмылIэужьыгъуэхэм щылажьэ школхэм я щытыкIэр зэхуэдэкъым икIи школ мыинхэр къэзылъахъэ гугъуехьхэр зэмылIэужьыгъуэщ. Абыхэм ящыщу къэбгъэлъэгъуэфынур зыщ - педагогым предметитIкIэ е нэхъыбэкIэ иригъэджэн хуей зэрыхъурщ. Ар зыпыщIар лэжьакIуэхэм я улахуэр ягъэува мардэхэм нэгъэсын зэрыхуейрщ. Дэтхэнэ зы педагогми мыпхуэдэ школым зы предметкIэ фIэкIа щримыгъаджэмэ, абы и лэжьапщIэр ехуэхынущ.
Школ мыинхэм зегъэужьыным иджыпсту республикэм гулъытэ хэха щыхуащI. БлэкIа илъэсым «Егъэджэныгъэм зегъэужьыныр» Урысей Федерацэм и къэрал программэм хиубыдэу федеральнэ бюджетым къиутIыпща субсидиехэм я хьэкъкIэ Къэбэрдей-Балъкъэр Республикэм щыIэ къуажэ школ мыину 6-м я спорт залхэр зэрагъэпэщыжащ, спорт Iэмэпсымэхэр къащэхуащ. 2020 гъэм апхуэдэ лэжьыгъэхэр школ мыину 3-м щрагъэкIуэкIынущ.
«КъБР-м и Прохладнэ муниципальнэ администрацэм егъэджэныгъэмкIэ и управленэ» муниципальнэ кIэзонэ IуэхущIапIэм и унафэщI Золко Татьянэ зэрыжиIамкIэ, иджыпсту районым мыпхуэдэ школ мыину 6 щыIэщ икIи абыхэм дэтхэнэми еджакIуэ 54-м щегъэжьауэ 123-м нэс щIэсщ. Псори зэхэту къуажэ школ мыинхэм сабий 503-рэ, зи школ кIуэгъуэу мы куейм ис псоми я проценти 10-р щоджэ. А школхэр щылажьэр жылагъуэ нэхъ цIыкIу дыдэхэрщ. Ауэ еджапIэхэм я унэхэр блэкIа лIэщIыгъуэм и 60 - 90-нэ гъэхэм ящIауэ щытами, абыхэм тыншыпIэ псори къыщызэгъэпэщащ.
КъБР-м и Парламентым ЕгъэджэныгъэмкIэ, щIэныгъэмкIэ, щIалэгъуалэм я IуэхухэмкIэ и комитетым и унафэщI Емуз Нинэ зэIущIэм хэта псоми фIыщIэ яхуищIащ псалъэмакъ купщIафIэ зэрырагъэкIуэкIам папщIэ икIи къыхигъэщхьэхукIащ нэрылъагъу къащIа гугъуехьхэр къызэнэкIа хъун щхьэкIэ зыхуэфащэ Iуэхухэр убзыхупхъэу къызэрилъытэр.