КъБР-м щыIэ МВД-м щекIуэкIащ УГИБДД-м 2019 гъэм я лэжьыгъэм кърикIуахэм теухуа зэIущIэ. Управленэм административнэ законодательствэр гъэзэщIэнымкIэ и къулыкъум и ДПС къудамэм и унафэщIым и къуэдзэ, полицэм и полковник Махиев Заурбэч журналистхэр щыгъуазэ ищIащ я IэнатIэхэм зэфIагъэкIам. Ар тепсэлъыхьащ гъуэгу насыпыншагъэхэр гъэмэщIэным, гъуэгум щызекIуэхэм хабзэр ягъэзэщIэным теухуауэ къагъэсэбэп Iэмалхэм.
-2019 гъэм къэхъуащ гъуэгу насыпыншагъэ 644-рэ, ипэ ита илъэсым еплъытмэ, проценти 5,9-кIэ нэхъыбэ. Абыхэм хэкIуадэхэр процент 25-кIэ ехащ (цIыхуи 123-рэ). ИтIанэми, фэбжь зыгъуэтахэр проценти 6,7-кIэ нэхъыбэщ (776-рэ). Аварие нэхъыбэ къыщыхъуащ Iуащхьэмахуэ, Аруан районхэм, фэбжь хэзыхахэр щынэхъыбэщ Бахъсэн, Прохладнэ щIыналъэхэм. Нэхъ мащIэ хъуащ рулым чэфу дэтIысхьэхэм я зэранкIэ къэхъу насыпыншагъэхэр - жиIащ Махиев Заурбэч.
Къэрал автоинспекцэм и лэжьакIуэхэм блэкIа гъэм къыщIагъэщащ гъуэгум зэрыщызекIуэ хабзэр 904 027-рэ къызэпаудауэ. Абыхэм ящыщу 274648-р ГИБДД-м и лэжьакIуэхэм, 629379-р - зытх Iэмэпсымэхэм наIуэ къащIащ.
Административнэ Iуэху зыхэплъахэм кърикIуахэмкIэ Къэрал автоинспекцэмрэ суд органхэмрэ унафэ 887416-рэ къащтати, абыхэм ящыщу 475291-р ягъэзэщIащ. Къуэдыуэ сом 605110100-рэ тралъхьащ, япшынащ сом 385766700-рэ.
-Илъэс кIуам и щIышылэм ебгъапщэмэ, нобэкIэ гъуэгу къэхъукъащIэхэмрэ абыхэм фэбжь щызыгъуэтахэмрэ я бжыгъэр ехащ, ауэ щыхъукIи хэкIуэдахэр процент 80-кIэ нэхъыбэщ. Федеральнэ гъуэгухэм къыщыхъуащ авариеу 8, фэбжь хахащ цIыху 18-м. Аварие нэхъыбэ къохъу сыхьэти 18-м къыщыщIэдзауэ сыхьэт 22-м къриубыдэу, - къыхигъэщащ Махиев Заурбэч.
