Къэбэрдей-Балъкъэр Республикэм и Правительствэм и зи чэзу зэIущIэм щыхэплъащ цIыхухэм социальнэ дэIэ­пыкъуныгъэ етыным, узыншагъэр ­хъумэнымрэ егъэджэныгъэмрэ я IэнатIэхэм ехьэлIа лъэпкъ проектхэр гъэ­зэщIэным, агропромышленнэ комп­лексым зегъэужьыным, цIыхухэм хуа­щIэ транспорт Iуэхутхьэбзэхэр егъэ­фIэ­кIуэным, нэгъуэщIхэми.
Министрхэм я Кабинетым къищтащ паллиативнэ медицинэ дэIэпыкъуны­-гъэм ди щIыналъэм зыщегъэужьынымкIэ икIи Къэбэрдей-Балъкъэрым исхэм я узыншагъэр гъэбыдэнымкIэ программэхэр. Ахэр гъэзэщIэным Iэмал къитынущ сымаджэ хьэлъэхэм зэрадэIэпыкъур егъэфIэкIуэнымкIэ, цIыхухэм я узыншагъэр гъэбыдэнымкIэ. Программэхэр ятещIыхьащ 2024 гъэм нэсыху къриубыдэ зэманым.
Апхуэдэу республикэ бюджетым и субсидиехэр Налшык, Бахъсэн къалэ округ­хэм, Тэрч муниципальнэ районым я ­бюджетхэм дызэрыт илъэсым тегуэ­шэным теухуа унафэм и проектыр къащтащ. Субсидием и хьэкъкIэ ирагъэ­фIэ­кIуэну я мурадщ зи узыншагъэм сэкъат иIэу а щIыналъэхэм я еджапIэхэм щIэс сабийхэр зыхуей зэрыхуагъазэр.
Къэбэрдей-Балъкъэр Республикэм 2020 гъэм, 2021, 2022 гъэхэм я лъэхъэнэм тещIыхьа и республикэ бюджетым ирагъэзэгъыжын папщIэ зыхуэ­-фащэ зэхъуэкIыныгъэхэр халъхьащ «Мэкъу­мэш хозяйствэм зегъэужьыныр, мэкъу­мэш продукцэм, сырьём, ерыс­къып­хъэхэм я рынокыр зэблэгъэкIыныр» республикэ къэрал программэм зэхъуэ­кIыныгъэхэр халъхьащ. Абы ипкъ иткIэ КъБР-м и агропромышленнэ комплексым зегъэужьыным 2025 гъэм нэсыху трагъэкIуэдэнущ сом мин 10172083,1-рэ.
ЗэIущIэм хэтахэм даIыгъащ республикэм исхэр 2020 гъэм къалэ щIыбхэм ­гъущI гъуэгу транспортымкIэ зэрыщызекIуэну щIыкIэм теухуауэ КъБР-м и ­Правительствэмрэ Кавказ Ищхъэрэм щыIэ гъущI гъуэгу компаниемрэ зэращIылIэну зэгурыIуэныгъэм и проектыр.
КъыкIэлъыкIуэу тепсэлъыхьащ щIыналъэ гъуэгу фондым и бюджетым и ахъшэр 2020 - 2022 гъэхэм зэрытрагуа­шэм теухуа документым. Транспортым и инфраструктурэм зегъэужьыным ехьэ­-лIа Iуэхухэр дэгъэкIыным дызэрыт илъэ­сым хухах сом меларди 2-рэ мелуан 994-м нэблагъэ.
КъБР-м щIымрэ мылъкумрэ я IуэхухэмкIэ и министр Тохъу Аслъэн Правитель­ствэм хэтхэр щыгъуазэ ищIащ Прохлад­-нэ муниципальнэ районым и мэкъумэш щIапIэхэм ящыщу зы гектар промышленностым пыщIа Iуэхухэм хиубыдэ щIы Iыхьэ зэращIыр. Абы къыдэкIуэу КъБР-м и къэрал мылъкум хиубыдэ административнэ унэу метр зэбгъузэнатIэу 100-м ­щIигъу ветеранхэм я зэгухьэныгъэу тIум къагъэсэбэпын папщIэ ирагъэбыдылIэ.
Тэрч, Дзэлыкъуэ районхэм сабийхэм я узыншагъэр щрагъэфIакIуэ я лагерхэм бюджет ахъшэр зэрытрагуашэ щIыкIэр даIыгъащ. Гъэмахуэ зэманым а IуэхущIапIитIым сабийуэ 540-м нэблагъэм зыщагъэпсэхунущ.
ЗэIущIэм къыщащтащ республикэм и къэрал мылъкум хиубыдэ ухуэныгъэ концессие зэгурыIуэныгъэхэм япкъ иткIэ ятыну я мурадхэм я спискэр. Апхуэдэу Къэбэрдей-Балъкъэр Республикэм и деж балигъ мыхъуахэм я Iуэхухэмрэ абыхэм я хуитыныгъэхэр хъумэнымкIэ щыIэ комиссэм хэтхэр яубзыхуащ.