КъБР-м и Парламентым и гъатхэ лэжьэгъуэм и япэ зэхуэсыр щIышылэм и 30-м къызэIуахащ Урысей Федерацэмрэ Къэбэрдей-Балъкъэр Республикэмрэ я къэрал гимнхэмкIэ. ЗэIущIэр иригъэкIуэкIащ республикэм и хабзэубзыху орган нэхъыщхьэм и Уна­фэщI Егоровэ Татьянэ.
Депутатхэм даIыгъащ, езым зэрызахуигъэзам ипкъ иткIэ, КъБР-м и Парламентым ЩэнхабзэмкIэ, граж­дан жылагъуэм зегъэу­жьынымрэ хъыбарегъащIэ политикэмкIэ и унафэщI ­къулыкъур Пащты Борис щхьэщахыныр. Абы щы­гъуэми депутат къалэнхэр иIэу комитетым хэтыну ар къонэ, КПРФ-м и Къэбэрдей-Балъкъэр щIыналъэ ­къудамэм и унафэщIуи щы­тынущ.
ЗэIущIэм япэ еджэгъуэкIэ къыщащтащ «КIэрыхубжьэ­рыхухэм ятеухуауэ» Къэ­бэрдей-Балъкъэр Республикэм и Законым зэхъуэкIы­ныгъэхэр хэлъ­­хьэным и IуэхукIэ» ­КъБР-м и законым и проектыр. КъБР-м и Парламентым Мэкъумэш Iуэху­хэмкIэ, щIыуэпсыр къэгъэ­сэбэ­пы­нымрэ дыкъэзыухъуреихь дунейр хъумэнымкIэ и комитетым и унафэщI ТекIушэ Артур зэрыжи­IамкIэ, ар зэхагъэуващ 2019 гъэм ба­дзэуэгъуэм и 26-м «КIэрыху­бжьэрыхухэм ятеу­хуауэ» Федеральнэ зако­ным зэхъуэ­кIыныгъэхэр хэлъ­хьэным ехьэлIауэ» ­ФЗ-№225-мрэ «Рос­атом» атом къарумкIэ къэрал корпорацэм и IуэхукIэ» Федеральнэ законымрэ къызэращтам ипкъ иткIэ.
ЗэхъуэкIыныгъэхэр ягъуэ­тыну зэIущIэм къыщыхалъ­хьащ «Творческэ лэжьа­кIуэ­хэмрэ КъБР-м щэнхабзэм епхауэ щыIэ зэгухьэныгъэ­хэмрэ ятеухуауэ» КъБР-м и Законымрэ Къэбэрдей-­Балъкъэр Республикэм Административнэ хабзэхэм ятеухуа и кодексымрэ.
ЗэIущIэм щагъэбелджы­лащ Урысей Федерацэм и Президент Путин Влади­-мир 2020 гъэм щIышылэм и 15-м УФ-м и Федеральнэ Зэхуэсым Зэрызыхуигъэзам къыщыгъэлъэгъуахэр гъэ­зэ­щIэным теухуауэ КъБР-м и Парламентыр зэлэжьыну­хэр. КъБР-м и Парламентым Къэпщытэныгъэмрэ регламентымкIэ и комитетым и унафэщI Кансаевэ Еленэ жиIащ къэралым и УнафэщIым къигъэлъэгъуа Iуэхугъуэ нэхъыщхьэ ды­дэ­хэр и тегъэщIапIэу, республикэм и хабзэубзыху IуэхущIапIэр 2020 гъэм и гъатхэ, бжьыхьэ сессиехэм зэрылэ­жьэнур. Ахэр зэрагъэзащIэм кIэлъыплъыныр къалэн щащIащ КъБР-м и Парламентым и УнафэщIым и къуэдзэхэм. Къэпсэлъам зэ­рыжиIамкIэ, IуэхущIапIэм гулъытэ хэха хуищIынущ къэпщытэныгъэ лэжьыгъэ­хэм. КъищынэмыщIауэ, Iуэху­гъуэ 28-рэ ирагъэ­кIуэ­кIыну я мурадщ: «Прави­тельствэм хухах сыхьэту 10, «стIол хъурейрэ» семинару 5, Парламентым и комитетхэм я зэIущIэу 12, едэIуэныгъэу 1.
КъБР-м и хабзэубзыху ­орган нэхъыщхьэм къыщы­мы­гъэлъэгъуа политикэ парти 6-м («Власть - Народу» Урысей цIыхубэ-хэкупсэ парт», «Пенсэм щысхэм я Урысей парт», «Союз труда» урысейпсо политикэ парт, «Гражданская платформа», «Яблоко», «Роста» партхэм) я унафэщIхэмрэ къуэдзэ­хэмрэ зэIущIэм хэтащ. ЛIыкIуэхэм я Iуэху еплъы­кIэхэр къагъэлъэгъуащ Къэбэрдей-Балъкъэрым и демографие зыужьыныгъэр зыхуэдэм теухуауэ. Дэтхэнэми къыхигъэщащ а Iуэхум лъэпощхьэпо хуэхъухэм зэ­ращыщыр щIыналъэм иIэпхъукIыр, унагъуэ зэбгъэдэ­кIыжхэр зэрыщыкуэдыр. Къэпсэлъахэм зэрыжаIамкIэ, ди къэралым и дежкIэ ухэзыгъаплъэщ лэжьэфыну ныбжьым итхэм ящыщу куэд зэрылIэри.
«Гражданская платформа» политикэ партым и Къэбэрдей-Балъкъэр щIыналъэ къудамэм и секретарь АфIэунэ Аслъэн жи­Iащ цIыхухэм я бжыгъэм хэхъуэ­ныр щIыналъэм и социально-экономикэ щы­ты­кIэм, цIыхум я псэукIэр зэ­ре­фIакIуэм зэрелъытар. Ап­хуэдэуи абы къыхигъэщащ республикэм лэжьыгъэ IэнатIэщIэхэр къызэ­ры­щы­зэ­гъэпэщыпхъэм гулъытэ ин хуэщIын зэры­хуейр.
-УФ-м и Президентым Федеральнэ Зэхуэсым Зэ­ры­зыхуигъэзам къыщиIэтащ унагъуэщIэхэм къэралыр зэрадэIэпыкъу ахъшэм зэрыхагъэхъуэныр. Ауэ абыкIи зэфIэкIыну къыщIэ­кIынукъым демографиер къэIэта хъуныр. ДызэреплъымкIэ, гулъытэ хэха ­ягъуэтын хуейщ бын куэд щапI, хуэмыщIа унагъуэхэми интернатхэм къыщыхъу сабийхэми, - жиIащ АфIэу­нэм. - Мыхьэнэшхуэ иIэн ­хуейщ республикэм и егъэ­джэныгъэм и фIагъми курыт еджапIэхэр ирикъуу диIэнми. НэгъуэщI лъэныкъуэкIэ укъыщеплъмэ, цIыху­хэм я бжыгъэм хэзы­мы­гъахъуэ лъэпощхьэпохэм ящыщщ щIыналъэм щып­сэухэр зэриIэпхъукIыр. Щы­ты­кIэм зихъуэжын папщIэ, нэгъуэщI щIыпIэхэм щIэныгъэ щызэзыгъэгъуэта ди щIалэгъуалэр къэкIуэ­жы­ным сэбэп дыхуэхъун ­хуейуэ къыдолъытэ.
«НППР - Власть Народу» политикэ партым и уна­фэ­щIым и къуэдзэ Гундаров Игорь къыхилъхьащ демографием и щытыкIэр зыхуэкIуэмрэ абы и хэ­кIы­пIэхэмрэ зэхагъэкIын му­радкIэ, Кавказ Ищхъэрэм и республикэхэм я лIыкIуэхэр зыхэтыну зэхуэсышхуэ къы­зэрагъэпэщын зэрыхуейр.