Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым и IэщIагъэлIхэри студентхэри щIэх-щIэхыурэ хэтщ къэралпсо, дунейпсо зэхыхьэ зэмылIэужьыгъуэхэм. Апхуэдэу, КъБКъУ-м и унафэщIхэм ящыщ Алътуд Юрийрэ Хьэшыр Светланэрэ иджыблагъэ ирагъэблэгъащ илъэс къэс екIуэкI «Гайдар и цIэкIэ зэхуэс» («Гайдаровский форум») дунейпсо щIэныгъэ-практикэ конференцым. Абы хэтащ къэрал куэдым я эксперт цIэрыIуэхэр.
«Урысей Федерацэмрэ дуней псомрэ: Къэунэхуа илъэсипщIым къигъэув Iуэхугъуэхэр» фIэщыгъэр зиIа зэхуэсым апхуэдэу кърихьэлIащ теоретик цIэрыIуэхэр, практик Iэзэхэр, финансист ехьэжьахэр, хьэрычэтыщIэ ахъырзэманхэр. Форум иныр къалъытащ илъэсым и бизнес-къэхъукъащIэ нэхъ инхэм ящыщу икIи «TheMoskowTimesAwards» саугъэтыр ипэкIэ къыхуагъэфэщауэ щытащ. Урысей Федерацэм щIэх-щIэхыурэ зи гугъу щащI зэхуэсхэми яхэтщ ар. «TheFinansialTimes» журналми ар хигъэхьащ дуней псом и къэхукъащIэ нэхъ цIэрыIуитхум.
Зэхуэс иным и пленарнэ Iыхьэр зэфIэкIа нэужь, абы кърихьэлIахэм лэжьыгъэм щыпащащ секцэ щхьэхуэхэм. Ди щIыналъэм икIа щIэныгъэлIхэр хэтащ «Урысей Федерацэм и гъащIэм къыхыхьэ Iуэху зехьэкIэщIэхэр: къэкIуэнур доубзыху» псалъэмакъ щхьэпэм. Алътуд Юрий къызэхуэсахэм яхутепсэлъыхьащ гъащIэм къыхыхьэ технологие пэрытхэр, еплъыкIэщIэхэр, жэрдэмыщIэхэр еджапIэ нэхъыщхьэхэм шэщIауэ къызэрыщагъэсэбэп щIыкIэхэм. Псалъэмакъым хэтахэу - УФ-м щIэныгъэмкIэ и министру щыта Котюков Михаил, «РОСНАНО» IэнатIэм и пашэ Чубайс Анатолий, нэгъуэщI IэщIагъэлI цIэрыIуэхэм и утыку кърахьа Iуэхугъуэхэр епхат центрымрэ щIыналъэхэмрэ яку дэлъыпхъэ зэпыщIэныгъэхэм, ахэр сыт и лъэныкъуэкIи дяпэкIи нэхъри гъэбыдэн зэрыхуейм.
КъБКъУ-м и проректор Хьэшыр Светланэ, «Наукометрие 2.0: бжыгъэхэр зи лъабжьэ зэхъуэкIыныгъэхэр» псалъэмакъым хэту, утыку кърихьащ иджырей лъэпкъ щIэныгъэм и зыужьыныгъэм лъэпощхьэпо къыхуэхъу Iуэхугъуэхэр, апхуэдэуи жиIащ бжыгъэхэр зи лъабжьэ технологие пэрытхэр сыт хуэдэ IэнатIэми шэщIауэ къызэрыщыгъэсэбэпыпхъэр.
Дунейпсо форумым щытепсэлъыхьащ ди къэралым и зыужьыныгъэм и дежкIэ мыхьэнэшхуэ зиIэ нэгъуэщI Iуэхугъуэхэми. Апхуэдэхэм ящыщщ секцэ зэмылIэужьыгъуэхэм къыщаIэта унэтIыныгъэхэу «Лъэпкъ технологие политикэмрэ щIыналъэхэм яIэ щхьэхуэныгъэхэмрэ», «Дунейпсо зэдэлэжьэныгъэхэр: IэщIагъэщIэхэр къызэрыунэхумрэ абыхэм зэрыхуегъэджапхъэхэмрэ», «Лэжьыгъэ IэнатIэхэр зыхуэныкъуэ технологие пэрытхэр», «Бжыгъэхэр зи лъабжьэ революцэр - егъэджэныгъэм», нэгъуэщIхэри.
