Апхуэдэ фIэщыгъэ иIащ Шэджэм къалэм дэт ЩэнхабзэмкIэ унэм иджыблагъэ щекIуэкIа, КIыщ Мухьэдин и щIыхькIэ къызэрагъэпэща хэгъэгу фестиваль-конкурсыр зэрызэхуащIыж концертым. Къызэхуэсахэр япэщIыкIэ ирагъэплъащ «Си лэжьыгъэр. КIыщ Мухьэдин» документальнэ фильм кIэщIым. ИужькIэ абыхэм Iэмал яIащ сурэтыщI гъуэзэджэм и IэдакъэщIэкIхэр видеокIэ зрагъэлъагъуну.
Фигу къэдгъэкIыжынщи, КIыщ Мухьэдинрэ абы и дэIэпыкъуэгъу пэж икIи и щхьэгъусэ Мосс Жаклинрэ илъэс куэд хъуауэ Испанием щопсэу.КIыщыр ХудожествэхэмкIэ Урысей Академием и академикщ, Къэбэрдей-Балъкъэр Республикэм и цIыхубэ, УФ-м щIыхь зиIэ я сурэтыщIщ, гъуазджэхэмкIэ европей академиеу Бельгием щыIэм хэтщ. Илъэс 60 хъуауэ творческэ IэнатIэм пэрытщ. Испанием щыщ Андалузие щIыналъэм щыIэ Барбате къалэм КIыщ Мухьэдин и фонд мыгувэу къыщызэIуахынущ. Ар щылэжьэну унэм метр зэбгъузэнатIэ 500 и инагъщ. Абы къегъэлъагъуэ ди лъэпкъэгъум и зэфIэкIыр зэрылъагэр, абы дуней псом пщIэшхуэ къызэрыщыхуащIыр.
ЗэIущIэм кърихьэлIащ цIыху куэд. Ди лъэпкъым, республикэм я дежкIэ абы и творчествэм иIэ мыхьэнэм и гугъу ищIу къэпсэлъащ Шэджэм ЕтIуанэ къуажэм и щIыпIэ администрацэм и Iэтащхьэ Ахъуэхъу Анзор. Абы къызэрыхигъэщащи, КIыщыр къыщалъхуа къуажэр ирогушхуэ апхуэдэ сурэтыщI Iэзэ я жылэм къызэрыдэкIам.
- КIыщ Мухьэдин Къэбэрдей-Балъкъэрым и мызакъуэу, Урысейми, дуней псоми щыцIэрыIуэ сурэтыщI Iэзэщ. Абы ди нэгум къыщIигъэувэ дэтхэнэ и зы IэдакъэщIэкIри псэкIэ зыхыуегъащIэ, нэгъуэщI нэкIэ урегъэплъыф, - жиIащ Мухьэдин и ныбжьэгъу Бгъэжьнокъуэ Заурбэч.
- КIыщым хуэдэ цIыху уи лъэпкъым къыпхэкIыныр куэд и уасэщ. Абы хузэфIэкIащ Шэджэм щIыналъэм и цIэр дунейм фIыкIэ щигъэIун. Дрогушхуэ, ди щхьэр лъагэу дегъэлъагъуж абы, - къыхигъэщащ Шэджэм районым и щIыпIэ администрацэм и унафэщIым и къалэнхэр зыгъэзащIэ Борсэ Юрэ.
Абы КIыщым тыгъэ хуищIащ къамэ.
Апхуэдэу КIыщым псалъэ гуапэ хужаIэу зэIущIэм къыщыпсэлъащ КъБР-м щIыхь зиIэ и артисткэ Гъэсашэ Наталье, Шэджэм районым и щIыпIэ администрацэм и унафэщIым и къуэдзэ Iэрыпщэ Жаннэ, Шэджэм къалэм дэт щэнхабзэмкIэ и унэм унафэщI Вэрыкъуэ Ларисэ сымэ.
КIэух концертым зыкъыщагъэлъэгъуат уэрэд жыIэнымкIэ зэпеуэм къыщыхэжаныкIахэу Бейтыгъуэн Сабринэ, Уэлджыр Дианэ, Къэзакъ Тимур, Шыбзыхъуэ Беллэ, Тутыкъу Дианэ, Рябич Станислав, Журт Дианэ, Быхъурэ Роксанэ сымэ, «Гуащэнэ», «Надежда» гупхэм. Гран-При саугъэтхэр къахьащ Шэру Iэминэ, Башиевэ Данэ, Даурбэч Анжеликэ сымэ.