Башчыны алгъышлауу
Нальчикде «Шёндюгю Россейде ислам праволу культура: болуму эм келир заманда халы» деген темагъа халкъла аралы практикалы конференциягъа Кувейтден, Азербайджандан, Къазахстандан, Узбекистандан, Абхазиядан, Россейни субъектлеринден дин къуллукъчула, алимле, иймамла жыйылгъандыла. Аланы араларында христиан, иудей динлени келечилери да болгъандыла. Илму тюбешиу «Синдика» къонакъ юйде бардырылгъанды. Ол Сыйлы Къуранны сурасын окъуудан башланнганды.
Ызы бла КъМР-ни Башчысыны Администрациясыны таматасы Мухамед Кодзоков республиканы оноучусу Казбек Коковну конференциягъа келгенлеге алгъышлауун окъугъанды. Анда битеу дунияда да арт кезиуде динни жамауат жашауда магъанасы ёсгени, къырал-конфессияла аралы политиканы айнытыргъа, ислам праволу культураны терен тинтирге кереклиси да чертиледи.
«Къабарты-Малкъарда къырал власть органланы бла Муслийманланы дин управлениясыны араларында къаты байламлыкъла къуралгъандыла. Исламны келечилери къырал эм жамауат структурала бла бирге инсанларыбызны тюз ниетде юйретиуге, мамырлыкъны, келишиулюкню, ангылаулукъну сакълаугъа уллу къошумчулукъ этедиле», - деп айтылады.
терс ангылатыуну унамазгъа
Республиканы Муслийманларыны дин управлениясыны башчысы Хазратали Дзасежев а конференциягъа билимли алимле, дин къуллукъчула къатышханлары сюзюлген теманы магъаналылыгъына, шёндюгю заманда ислам праволу культураны энчиликлерин терен тинтирге кереклисине шагъатлыкъ этгенин чертгенди. Ол илму жыйылыу ДУМ-ну, РФ-ни Президентини Администрациясыны, Ислам илмуну, культураны эм билим бериуню фондуну, КъМР-ни Граждан обществону институтлары эм миллетлени ишлери жаны бла министерствосуну себепликлери бла къурагъанын билдиргенди.
Конференцияны темасыны юсюнден айта, муфтий Россейде ислам праволу культураны болумуна, аны тюз ангылатыугъа энчи эс бурулургъа кереклисин белгилегенди. «Биз информация кенг жайылгъан кезиуде жашайбыз. Аны ючюн а алгъын аз сюзюлген, артыкъ белгили болмагъан шартла ачыкъланып башлагъандыла. Ма бюгюннгю жыйылыуда да аладан бирлерине жууапла табарбыз деп ышанама. Ол санда патчахлы Россейде динле бла байламлы политика къалай бардырылгъаныны, ислам правону сингдириуде халкъла аралы сынауну, шёндюгю Россейде къадийле тамамлагъан борчланы», - дегенди ол.
Муфтий арт кезиуде алимле исламны саулай, энчи уа праволу культураны тинтиуге бютюн уллу эс бургъанларын иги шартха санагъанды. «Алай алыкъа ала тамамдыла, битеу соруула сюзюлгендиле деп айтырча тюйюлдю. Мен акъыл этгенден, шёндюгю жамауатны исламгъа кёз къарамын алышыргъа тийишлиди. Башхача айтханда, диннге келишмеген ниетлени, шериатны терс ангылатыуну тохтатыргъа керекди»,-дегенди ол.
Хазратали Олиевич бу кюнледе Бакуда бардырылгъан халкъла аралы саммитни юсюнден да айтханды. Анга Россейни делегациясыны санында Шимал Кавказны республикаларыны муфтийлери да къатышхандыла.