Урысейм и Правительствэм и УнафэщIым и къуэдзэ Мутко Виталий щIыналъэ зыужьыныгъэмкIэ комиссэм и зэIущIэ дыгъуасэ Москва щригъэ­кIуэ­кIащ. Абы хэтащ Къэбэрдей-Балъкъэр Республикэм и Iэтащхьэ КIуэкIуэ Казбек.
Зытепсэлъыхьа Iуэху нэхъыщхьэхэм ящыщщ бюджет захуаку зэхущытыкIэхэр, щIыналъэхэм я бюджетхэр къызэрызэгъэпэщар зэхуэгъэхъунымкIэ ­дотацэхэр зэрытрагуашэр, къэ­рал унафэр зэрызэрагъакIуэр егъэфIэкIуэныр, лъэпкъ проектхэр зэтегъэувэным зэрыбгъэ­дыхьэ щIыкIэхэр убзыхуныр.
Мутко Виталий зэрыжиIамкIэ, лъэпкъ проектхэр гъэзэщIэныр зэтегъэувэным хуэгъэзауэ къэ­ралым и субъектхэм иужьрей зэманым Iуэху пыухыкIахэр щы­зэфIагъэкIащ. «Зэлэжьыну Iуэхугъуэ псори нобэм ирихьэлIэу ягъэбелджылащ икIи ахэр зэфIагъэкIын папщIэ зыхуеину мылъкумрэ ахъшэмрэ щIыналъэхэм яIэрыхьащ. Иджыпсу къэбгъэ­лъагъуэ хъунущ лъэпкъ проектхэр процент 60-кIэ ахъшэкIэ къы­зэрызэрагъэпэщар. Ар бжыгъэ хъарзынэщ», - къыхигъэщхьэ­хукIащ Мутко Виталий.
Вице-премьерым адэкIэ къигъэлъэгъуащ иджыпсту илъэсищым тещIыхьа бюджетым зэрелэжьыр икIи абы и лъэныкъуэкIэ финанс документ нэхъыщхьэм къыщыгъэлъэгъуа ахъшэ псори муниципальнэ щIыналъэхэм яIэрыгъэхьэныр къалэн нэхъыщхьэ дыдэу зэры­щытыр. ЩIыналъэхэмрэ федеральнэ министерствэхэмрэ я лIыкIуэхэм УФ-м и Правитель­ствэм и УнафэщIым и къуэдзэм яжриIащ къэралым и Президентым и деж ЩIыпIэ унафэр зегъэкIуэнымкIэ щыIэ советыр а Iуэхум зэман благъэм къриубыдэу зэрыхэплъэнур.
УФ-м и Президент Путин Владимир накъыгъэ мазэм къыдигъэкIа Указым къыщыгъэува Iуэхухэр гъэзэщIа хъун папщIэ къащтащ «Демографие», «Щэнхабзэ», «Узыншагъэр хъумэн», «Егъэджэныгъэ», «ПсэупIэмрэ къалэм и щытыкIэмрэ», «Экологие», «Шынагъуэншэ икIи фIагъ зиIэ автомобиль гъуэгухэр», «Лэжьыгъэм къыпэкIуэ хъерыр къэIэтынымрэ лэжьапIэншэхэр гъэмэщIэнымрэ», «ЩIэныгъэ», «Бжыгъэхэр зи лъабжьэ экономикэ», «Хьэрычэт IэнатIэ мыинымрэ курытымрэ, щхьэзакъуэ хьэрычэтыщIэхэм защIэгъэкъуэныр», «Дунейпсо кооперацэмрэ экспортымрэ» лъэпкъ проектхэм я паспортхэмрэ Магистральнэ инфраструктурэр къэгъэщIэрэщIэжынымрэ абы зегъэубгъунымкIэ комплекс планыр. Лъэпкъ проектхэр гъэ­зэщIэным 2024 гъэм нэсыху ­трагъэкIуэдэнущ сом триллион 25,7-рэ.
УФ-м и Правительствэм щIыналъэ зыужьыныгъэмкIэ и комиссэр къызэрагъэпэщащ Урысейм и стратегие щIыналъэ планхэр зэхэлъхьэнымкIэ властым и федеральнэ, щIыналъэ, щIыпIэ органхэм ирагъэкIуэкI лэжьыгъэр зэгъэуIун мурадкIэ.