РФ-ни табийгъат байлыкъла эмда экология министри Дмитрий Кобылкин бардыргъан кенгешде Къабарты-Малкъарны къоркъуулу табийгъат къыйынлыкъланы болдурмаз жаны бла проектине къаралгъанды. Аны юсюнден министерствону интернет-сайтында айтылады.
Кенгешге видео байламлыкъла халда КъМР-ни Правительствосуну Председатели Мусукланы Алий да къатышханды. Ол республикада тёгерекдеги къудуретни къоруулау жаны бла не мадарла этилгенлерини юсюнден айтханды.
Премьер министр билдиргеннге кёре, регионну властьлары республикада къоркъуулу табийгъат эмда хауа болумладан сакъланыр ючюн тийишли программаны проектин жарашдыргъандыла. Анда жер башында хауаны жылы бола баргъаны, ол тёгерекдеги къудуретге келтирлик хата эсге алынады, черекле кётюрюлюрге, тауладан ырхыла келирге боллугъуна да энчи эс бурулады. Шёндю бу документ федерал власть органлада сюзюудеди.
Дмитрий Кобылкин республиканы бу жарсыууна тийишлисича къаралгъанын, сагъынылгъан мадарла кёп къоранчладан къутулургъа амал берлигин чертгенди. «Бизни къыралда эм уллу рекреация-саулукъландырыу араладан бири Къабарты-Малкъарды, ол себепден анда къоркъуусузлукъну жалчытыугъа энчи эс бурургъа керекди, министерство да аны контрольгъа алады», - деп белгилегенди ол.
Росприроднадзорну башчысыны къуллугъун толтургъан Амирхан Амирханов Тамбукан кёлню хайырланыу бла байламлы экологиягъа заран жетмезине да эс бурургъа кереклисин айтханды. Министрни орунбасары, жер тюбюнде байлыкъланы хайырланыу жаны бла агентствону (Роснедра) таматасы Евгений Киселёв а, регионда санатор-курорт багъыуда гара суулагъа тийишли магъана берилгенин, аны ючюн бу байлыкъны комплекс халда аз-аздан тинтип турургъа кереклисин белгилегенди.
Кенгешде тийрелени кир-кипчикден тазалау, аны тийишлисича жарашдырыу не халда болгъанына да къаралгъанды. Республикада болгъан полигонла 63 процентге толгъанлары, иш былай барса, ала энтта да жаланда юч жылгъа жетериклери эсгертилгенди. Болумну тюзетиу жаны бла жер-жерледе мадар этерге кюрешгенлерини юсюнден да айтылгъанды. Сёз ючюн, Прохладный шахар округда былтыр бир жылгъа 50 минг тонна кир-кипчикни айыргъан эмда жарашдыргъан предприятие ачылгъанды. Быйыл а Нальчикде аллай заводну къурулушу бошалгъанды.
Министр дагъыда «Таза къырал» деген проектни чеклеринде Тырныауузда комбинатдан къалгъан-къулгъанла жыйылгъан жерде аладан тазалау ишле къалай баргъанларын соргъанды. Республиканы келечиси айтханнга кёре, быйыл сентябрьде аланы аслам кесеги тамам этилликди, келир жылда уа толусунлай бошаргъа белгиленеди.
Жыйылыуну ахырында тийишли оноула этилгендиле, аланы толтурууну болжаллары да тохташдырылгъандыла.
