Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым жэпуэгъуэм и 10-м щыхьэщIащ Ипщэ федеральнэ уни­верситетым (ИФУ) и студентхэм къызэрагъэпэщауэ Кавказ Ищхъэрэм щекIуэкI автомобиль къы­зэдэжэм хэтхэр. АбыкIэ хъыбар къыдигъэщIащ еджапIэ нэхъыщ­хьэм и пресс-IуэхущIапIэм.
«Кавказым мамырыгъэ щыIэну» проектым и зы Iыхьэщ а зэ­хьэзэхуэр. Къыхэгъэщыпхъэщ, мы Iуэхур Ипщэ федеральнэ университетым илъэсипщI хъуауэ зэрыригъэкIуэкIыр, щIалэгъуалэр хэкупсэу, хабзэ яхэлъу къагъэтэджын папщIэ.
Кавказыр яфIэгъэщIэгъуэну унэ­тIыныгъэ зэхуэмыдэхэм щIэс студент гупым я тхьэмадэ, ИФУ-м социологиемрэ щIыналъэр джынымкIэи институтым и унафэщI Бедрик ­Андрей гуапэу къазэрыIущIам пап­щIэ фIыщIэ яхуищIащ бысымхэм, аргуэру ди щIыпIэм къеблэгъэну зэригуапэри жиIащ.
- Ди университетхэр илъэс куэд щIауэ зэдолажьэ. Лъэныкъуэ куэдкIэ зэгъусэу къэхутэныгъэхэр идогъэ­кIуэкI, нэхъыбэу дджыри Кавказым и тхыдэмрэ абы щыпсэу лъэпкъ зэхуэмыдэхэм я зэхущы­тыкIэмрэщ. «Кавказым мамырыгъэ щыIэну» проектым ипкъ иткIэ Къэбэрдей-­Балъкъэр къэрал университетым и лIыкIуэхэри ныхохьэ ди деж щIэх-щIэхыурэ щедгъэкIуэкI Iуэхухэм. Дэ ди гуапэщ Налшык ­дыкъэкIуэну, ди лэжьыгъэхэр мыбы утыку щитхьэну Iэмал дызэриIэр, - жиIащ Бедрик ­Андрей.
АдэкIэ абы къызэхуэсахэр щигъэгъуэзащ къызытекIухьа проектым и тхыдэм, абы и зэхэлъыкIэмрэ гъэ­зэщIа зэрыхъумрэ. Апхуэдэуи къы­хигъэщащ Кавказ Ищхъэрэ, Ипщэ федеральнэ щIыналъэхэм ит еджапIэ нэхъыщхьэ 11-м я щIалэгъуалэ, лэжьакIуэ куэд Iуэхум зэрыхэтыр, апхуэдэу хъыбарегъащIэ IуэхущIапIэхэр къазэрыдэлажьэр.
«Кавказым мамырыгъэ щыIэну» проектым автомобилкIэ къызэдэ-жэм и мызакъуэу хэтщ щIалэгъуа­лэм я щIэныгъэм щыхагъахъуэ гъэмахуэ школ, апхуэдэу конференц зэхуэмыдэхэри. Форумым къри­кIуахэм щэкIуэгъуэм и 12-13-хэм хэплъэжынущ.
ХьэщIэхэм презентацэр ягъэлъэгъуа нэужь, КъБКъУ-м и студент­хэм социологие, щэнхабзэ къэ­хутэныгъэхэм теухуа псалъэмакъхэр драгъэкIуэкIащ. Абы къищынэ­мы­щIауэ, терроризмэм и идеологием пэщIэтыным теухуауи епсэлъылIащ.