Тюнене Музыкалы театрда Адыгланы (черкеслилени) кюнюне аталып къууанчлы жыйылыу болгъанды. Анга келгенлеге театрны аллында миллет кийимледе жаш артистле халкъ тепсеуле бла тюбегендиле.
Фойеде уа суратчыла Заурбек Бгажноковну, Анатолий Жиловну, Руслан Мазлоевни, Мурат Дышековну чыгъармалары бла шагъырейленирге онг болгъанды. «Адыгла. Ёмюрлени теренинден» этнография кёрмючде нарт эпосха кёре жазылгъан суратла, графика, халкъны жашау турмушу, аскер хорламлары бла байламлы чыгъармала бар эдиле.
Къууанчлы жыйылыугъа КъМР-ни Башчысыны Администрациясыны таматасы Мухамед Кодзоков, Парламентни спикери Татьяна Егорова, премьер-министр Мусукланы Алий, министрле, депутатла, жамауат организацияланы келечилери келгендиле. Байрамгъа уа Къарачай-Черкесден, Адыгеядан, Краснодар эм Ставрополь крайладан, Армавирден, адыгла жашагъан тыш къыралладан делегацияла да жыйылгъандыла.
Халкъла аралы черкес ассоциацияны башчысы Хаути Сохроков жамауатны алгъышлай, быллай байрам къуралырын миллет эрттеден сакълагъанын, аны республиканы битеу халкълары да бирге белгилегенлерин чертгенди. «Биргебизге жашагъанла тарыхыбызны, аны бушуулу кезиулерин да биледиле. Сынауладан башын эниш этмей ётюп, халкъ тилин, культурасын, миллет энчиликлерин сакълап, аланы шёндюгю тёлюлеге жетдиргенди», - дегенди ол.
Хаути Хазритович, бушуу этип, ата-бабала кёрген къыйынлыкъланы бармакъгъа чёргеп турургъа жарамагъанын да айтханды. «Ёсюп келген тёлюлени келир жашаугъа ышаннгылы къараргъа юйретирге тийишлиди. Биз а къарындаш халкъларыбыз бла бирге бушууларына жарсыгъанбыз, байрамларына къууаннганбыз. Бюгюн да барыбыз да бирге болгъаныбыз артыкъда магъаналыды», -дегенди ол эмда республиканы миллетлерине бирлик, мамырлыкъ, келишиулюк тежегенди.
Къууанчлы жыйылыугъа келгенлеге концерт программа да кёргюзтюлгенди.