КъБР-м и Лъэпкъ музейм къыщызэIуахащ дыщэкI, IэпщIэлъапщIэ Габоев Мусэбийрэ пасэрей упщIэ алэрыбгъухэр зэхуэзыхьэсыж Локьяев Рашитрэ я гъэлъэгъуэныгъэ.
- IэпщIэлъапщIэ Габоев Мусабий и лэжьыгъэхэмрэ Локьяев Рашит зэхуихьэса упщIэхэмрэ я гъэлъэгъуэныгъэр зэуIу тщIащ нобэ. Ахэр щIэщыгъуэу зокIу, зэхозагъэ, - жиIащ Лъэпкъ музейм и унафэщI Накуэ Феликс гъэлъэгъуэныгъэр къыщызэIуихым.
ЗэIущIэм къыщыпсэлъащ КъБР-м щэнхабзэмкIэ и министрым и къуэдзэ Карчаевэ Iэминат.
- Хьэпшып гъэщIэгъуэнхэмрэ упщIэхэмрэ щагъэлъагъуэ пэшым укъыщыщIыхьэкIэ, пасэ зэманым бгъэзэж хуэдэщ. Балъкъэр лъэпкъым и гъащIэм IэпщIэлъапщIэным, гъуазджэм увыпIэшхуэ щаубыд. Мыбы щIэлъ дэтхэнэ хьэпшыпри зэпыбоплъыхь лъэпкъ гупсысэхэм ухэту. Нобэ Мусэбий дигъэлъагъу хьэпшыпхэр балъкъэр щэнхабзэм поджэж. ФIыщIэ лей хуэфащэщ упщIэ алэрыбгъу телъыджэхэр зэхуэзыхьэса, зыхъума Рашити. Сахуохъуа-хъуэ адэкIи дахагъэ къагъэ-щIыну, - жиIащ абы.
Урысейм гъуазджэхэмкIэ и академием и академик Пащты Герман къыщыпсалъэм къыхигъэщащ зы гъуазджэ лIэужьыгъуэм адрейр игъэдахэу зэрызэщIагъуар игу зэрыдыхьар.
- Лъэпкъ гъуазджэм и щапхъэ дахэ зыгъэлъагъуэхэм фIыщIэ фхузощI. Лъэпкъыбзэхэр, лъэпкъ щэнхабзэр хъумэным псом хуэмыдэу дыщелIэлIэн хуей мы зэманым фи лэжьыгъэм псом хуэмыдэу и мыхьэнэр лъагэщ. Фэ фхъумэр лъэпкъ щIэинщ, - захуигъэзащ зи лэжьыгъэр ягъэлъагъуэхэм ЩIэныгъэхэмкIэ Урысей академием и академик Апшаев Магомед.
КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ жиIащ гъэлъэгъуэныгъэм зэуIу щащIа хъугъуэфIыгъуэхэм тхы-дэрэ щэнхабзэрэ зэрахъу-мэр.
- Iуэхур къызэзыгъэпэщахэми мыбдеж зи лэжьыгъэ щытлъагъухэми фIыщIэ фхузощI, япэрауэ. Мыбы ди щэнхабзэр ехъумэ, егъэдахэ. Псом хуэмыдэу мыпхуэдэ Iуэхугъуэхэм мыхьэнэ яIэщ щIэблэр тхыдэм хэгъэгъуэзэнымкIэ, пасэм IуэхущIафэ дахэу яIахэр яIэщIэмыхунымкIэ. Мыбыхэм бзэри, хабзэ-щэнхабзэри яхъумэ, - жиIащ генерал-лейтенант Аттоев Борис къыщыпсалъэм.
- Си гугъакъым зэгуэр си IэрыкIхэр мыпхуэдэу згъэлъэгъуэну. Илъэс куэд хъуауэ мыбыхэм селэжьми, си ныбжьэгъухэм сытрагъэгушхуэу, иджыщ япэу хьэпшыпхэр утыку къыщисхьар. IэрыкIхэм елэжьын щIэздзауэ щытащ генерал-лейтенант Аттоев Борис и фIыгъэкIэ. Зэгуэр абы и унэм сыщыхьэщIэу, и унэм щыхьыбжьэ щIэлъыр сигу ирихьати, тыгъэ къысхуищIащ. Сэ щыхьыбжьитI сиIэт абы нэмыщI. Арати, сегупсысащ абыхэм къахэпщIыкI хъунум. Япэ дыдэу стIол сщIащ. Абы сызыIэпишэри, унэлъащIэ гъэщIэрэщIа- хэр къыхэсщIыкIыу зезгъэсащ. Си IэдакъэщIэкIхэр зылъагъу си ныбжьэгъухэми емышу схузэхуахьэсырт ахэр къызыхэсщIыкIхэр. Си хьэпшыпхэм, унэлъащIэхэм дэтхэнэми фIэщыгъэ хуэсщIащ. Псалъэм папщIэ, мыбыхэм куэду яхэтщ къызыхэсщIыкIар тыгъэ къысхуэзыщIам я цIэр зыфIэсщахэр, - жиIащ Габоевым.
Илъэс куэд хъуауэ зэхуи-хьэс упщIэ алэрыбгъухэм тепсэлъыхьащ, Iуэхур къызэзыгъэпэщахэм фIыщIэ яхуищIащ Локьяев Рашит.
ГУГЪУЭТ Заремэ.
Сурэтхэр Къарей Элинэ трихащ.
