Бу кюнледе Нальчикде Сабийлени эмда жаш тёлюню чыгъармачылыгъыны къаласында «Сигма» илму араны ХХХIII республикалы конференциясы болгъанды. Жыл сайын бардырылыучу бу жыйылыуну КъМР-ни Жарыкъландырыу эм илму министерствосу къурагъанды.
Чыгъармачылыкъ къаланы директоруну къуллугъун толтургъан Аксана Карашаева республиканы битеу шахар округларындан эмда муниципал районларындан келген устазланы, ата-аналаны да сыйлы къонакъла эмда экспертле бла шагъырейлендиргенди.
Жыйылгъанланы алларында КъМР-ни жарыкъландырыу эм илму министрини орунбасары Екатерина Мисостова, физика-математика илмуланы кандидаты, устазланы билимлерин ёсдюрген араны математика жаны бла айнытыу лабораториясыны таматасы Артур Насипов, тарых илмуланы доктору, КъМКъУ-ну право, экономика эмда финансла институтуну профессору Алексей Абазов да сёлешгендиле.
Андан ары ишле секциялада онсегиз тюрлю жаны бла бардырылгъандыла. Алада, школ дерследен сора да, медицина, право, философия, экономика, искусствоведение, этнография, педагогика эмда психология жаны бла окъутуу да эсге алыннгандыла.
Тюбешиуню кезиуюнде школчула кеслери алларына бардыргъан тинтиу ишле сайланнгандыла эмда алчы жерлеге чыкъгъанлагъа саугъала берилгендиле. Ала дагъыда «Жашлыкъ. Илму. Маданият» деген битеуроссей конференциягъа къатышыргъа эркинлик алгъандыла.
Холаланы Марзият.