Музыкэ къэрал театрым дыгъэгъазэм и 12-м ще­кIуэкIащ «Къэбэрдей-Балъкъэрым и тхьэIухуд-2023» лъэпкъ зэпеуэр. Абы щытекIуащ «Призвание» медколледжым щеджэ Хьэбжокъуэ Тамилэ. Пшыхьыр ирагъэкIуэкIащ уэрэджыIакIуэ Теунэ Джэмалрэ Урыс Миланэрэ.

Тхыдэ дахэ къызыдекIуэкI зэхьэзэхуэм я зэфIэкI щеп­лъыжащ зи ныбжьыр илъэс 16-м щыщIэдзауэ 27-рэ хъу пщащэ зэкIуж икIи акъы­лыфIэу 11. КъыжыIапхъэщ, мы­гъэрей зэпеуэм «Мисс Рус­ское радио» щIыхьыцIэр 2007 гъэм зыхуагъэфэща Жы­лэ Илонэ и щапхъэу зэ­рыщытыр. Къэбгъэлъагъуэ­мэ, хъыджэбзхэм я нэхъы­бапIэр ди республикэм щопсэу. Абыхэм ­къадэкIуэу, зэ­пеуэм и зэфIэкI щеплъыжащ Беларусым щыщ, Гъуаз­- джэхэмкIэ Кавказ Ищхъэрэ къэ­рал университетым ще­джэ, абы щекIуэкIа «Мисс СКГИИ» зэхьэзэхуэм щы­текIуа, илъэситI хъуауэ Налшык щыпсэу Клундук ­Софьи. 
«Къэбэрдей-Балъкъэрым и тхьэIухуд-2023» зэпеуэм и къы­зэгъэпэщакIуэ, продюсер, режиссёр икIи сцена­-рист Къамбий Амир жиIащ ­нэ­хъапэкIэ екIуэкIа мыпхуэдэ зэпеуэхэм Интернет IэIэтыр щыхабзэу щытами, мы гъэм абы зэхъуэкIыныгъэ зэры­халъхьар. Музыкэ театрым кIуахэм Iэмал яIащ абы и щIыхьэпIэм деж щагъэува, тхылъымпIэ пхъуантэм зи сурэт тет, нэхъ ягу дыхьэ хъыджэбзым я Iэр хуаIэтыну. 
ЕгъэджакIуэ Iэзэхэм я нэIэм щIэту, хъыджэбзхэм мазэрэ ныкъуэкIэ зэхьэзэхуэм зыхуа­гъэхьэзыращ: утыку итыкIэ, зыIыгъыкIэ, лъэдакъэ теты­кIэ, къафэ, нэгъуэщIхэми. Жып­Iэнуракъэ, лъэпкъ фащэхэр къызыщыпсу, зэкIужу зыкъэзыгъэлъэгъуа дэтхэнэ пщащэми хуэфащэт тхьэIу­-худ щIыхьыцIэр. ЗэрытщIэщи, мыпхуэдэ зэпеуэхэм зэры­щыхабзэу, фIым я фIыжыр къыхэхыныр зи къалэн къэп­щытакIуэ гупым хэтхэми, дауи, я лэжьыгъэр тынштэ-къым. 
КъэпщытакIуэ гупым хэ-тащ модель IуэхущIапIэхэм-рэ щэн­хабзэ центрхэмрэ я лIыкIуэхэр, егъэджэныгъэм, спортым, хъыбарегъащIэ IэнатIэхэм я лэжьакIуэ цIэры­Iуэхэр, жылагъуэм щыщхэр, дахагъэмкIэ зэпеуэ зэмы­лIэужьыгъуэхэм пашэ щы­хъуа­хэр. Абыхэм къапщытащ пщащэхэм я Iущагъыр, IэпэIэсагъэр, я лъэпкъ фащэхэр зыхуэдэр, къафэхэм зэры­хуэмыхамэр. Апхуэдэу Кавказым щызекIуэ хабзэхэм, лъэпкъ щэнхабзэм зэрыщыгъуазэр ягъэнэIуащ, зэпеуэр езыгъэкIуэкIым и упщIэхэм жэуап иратащ, я акъыл жанагъэр къагъэлъагъуэу. 
Пшыхьыр и кIэм щынэблагъэм, къэпщытакIуэ гупым хэт Къардэн Залинэ жиIащ «Къэ­бэрдей-Балъкъэрым и тхьэ­Iуэхуд-2023» щIыхьыцIэр Хьэб­жокъуэ Тамилэ зэры­хуа­гъэ­фэщар. Зэпеуэм зэрихабзэу, нэгъабэ мыпхуэдэ зэпеуэм щытекIуа Гулиевэ Зульфия и тажыр иритащ Тамилэ. Япэ вице-мисс хъуащ Тау ­Дианэ. ЕтIуанэ вице-миссыр Хьэ­лышх Алинэщ. ТекIуахэм яхуэупсащ щIыхь тхылъхэмрэ саугъэтхэмкIэ. 
Зэхьэзэхуэр щIэщыгъуэ икIи гукъинэж хъуащ. Ар къызэ­зыгъэпэщахэм мыбыкIэ къалэну зыхуагъэувыжар щIалэгъуалэр лъэпкъ щэнхабзэм драгъэхьэхыныр, пщащэхэм    я дахагъэр, акъылыфIагъэр, щэныфIагъэр къагъэлъэ­гъуэ­ныр, зэфIэкI зиIэхэр къагъэ­нэIуэныр, нэхъри зрагъэу­жьынырти, къехъулIауэ жыпIэ хъунущ. 
Пшыхьыр ягъэдэхащ республикэм и артист цIэры­Iуэхэм. Зэпеуэр ирагъэкIуэ­кIащ КъБР-м ЩIалэгъуалэм я IуэхухэмкIэ и министерствэр я дэIэпыкъуэгъуу.

ТЕКIУЖЬ  Заретэ. 
Сурэтхэр  Къарей  Элинэ трихащ.