Гуп къызэрагъэпэщ
Бахъсэн щIыналъэм хыхьэ Ислъэмей къуажэм иджыблагъэ щекIуэкIащ Хэкум и ЛIыхъужьхэм я махуэр гъэлъэпIэным хуэунэтIауэ мас-рестлингымкIэ щIыналъэ зэхьэзэхуэ. Абы хэтащ илъэс 2007 - 2008 гъэхэм къалъхуа ныбжьыщIэхэу 50-м щIигъу.
Кумыщ Амдул, Къардэн Дамир, Тохъутэмыщ Аслъэн, Джэрыджэ Айдэмир, Хъуэт Темырлан сымэ я хьэлъагъ елъытауэ зыхэта гупхэм япэ увыпIэхэр зэпеуэм къыщахьащ.
Зэхьэзэхуэм кърикIуам ипкъ иткIэ мас-рестлингымкIэ Бахъсэн щIыналъэм и ныбжьыщIэхэм я гуп къыхэхам хэтынухэр ягъэбелджылащ.
Зэпеуэр къызэригъэпэщащ Бахъсэн щIыналъэм и администрацэм ЩIалэгъуалэм ядэлэжьэнымрэ спортымкIэ и къудамэм.
Къызэрахах зэхьэзэхуэм щытокIуэ
Краснодар къалэм иджыблагъэ щекIуэкIащ бэнэкIэ лIэужьыгъуэхэмкIэ студентхэм я урысейпсо зэхьэзэхуэ. Зэпеуэм хэтащ къэралым и щIыналъэхэм я бэнакIуэу 120-м щIигъу.
2024 гъэм екIуэкIыну урысейпсо гъэмахуэ универсиадэмрэ УФ-м и чемпионатымрэ ягъэкIуэнухэр гъэбелджылыным хуэунэтIауэ щытащ иджырей зэхьэзэхуэр икIи Къэбэрдей-Балъкъэрым и гъэсэнхэм абы медалитху къыщахьащ.
Килограмм 60 зи хьэлъагъхэм я гупым щыбанэ Хъуп Астемыр япэ увыпIэр иубыдащ. Зэхьэзэхуэм и дыжьын медалхэр къахьащ Щауэ Салимрэ (кг 63-рэ) БищIо Зауррэ (кг 82-рэ). Ещанэ увыпIэр яубыдащ Тэркъан Казбекрэ (кг 55-рэ) Къардэн Къамболэтрэ (кг 97-рэ).
ХЬЭЩЫКЪУЕЙ Олег.