ХьэIишэт и гур зи щыпыIэркъым унэм: дунейр щыуэфIхэм къыщIокIри, пщIантIэм дэт тIысыпIэм щотIысэх. ГъащIэ гъуэгуанэшхуэ къэзыкIуа цIыхубзым игу къигъэкIыжын и мащIэ - и сабиигъуэр, фызабэу къанэу гугъуехьыр зи натIэу къэгъуэгурыкIуа и анэр, и школ лъэхъэнэр. Сыту щIэхыщэу блэлъэта илъэсхэр. Сабий иригъэджэну япэ дыдэу класс бжэщхьэIу щебэкъуа махуэмрэ нобэрэ я зэхуаку дэлъщ илъэс 65-рэ. АтIэми, а зэманыр напIэдэхьеигъуэм къызэринэкIа къыфIощI. А здэщысым еджакIуэ цIыкIухэр блэкI-къыблэкIыжу илъэгъуамэ, я макъ зэхихамэ, ХьэIишэт нэщхъыфIэ къохъу икIи мазэ бжыгъэ ипэкIэ къызыпэрыкIа IэнатIэр, иригъэджа сабийхэр и нэгу къыщIоувэ, абыхэм яхэту къызыфIегъэщIри, пхужымыIэным хуэдизу дэрэжэгъуэ ин егъуэт.
И адэ Ехъутэныдж Дин ищIэжыркъым ХьэIишэт. Абы щыгъуэ ар сабий дыдэт. Бийр ди хэкум къыщытеуэм фронтым япэу дашахэм яхэхуат и адэр. Унагъуэм иужькIэ къащIащ Дин и Iуэхур зэрыхъуар: гъэрыпIэм ихуэри, абы иужькIэ и хъыбар гуэри къэIужакъым. Сыт ищIэнт бынищ къызыхуэна анэм? И бгыр щIикъузэри, гугъуехьыр и натIэу лэжьащ, и сабийхэм я ныбэ имыгъэныкъуэу, щыгъыныджэу димыгъэту.
ХьэIишэт щысабий цIыкIум ехъуапсэрт школым кIуэ нэхъыжьыIуэхэм. ИкIи еджэным апхуэдизу зи нэ къыхуикI и сабийр анэм ешэри, щIегъэтIысхьэ япэ классым, ХьэIишэт нэхърэ нэхъ цIыкIуи нэхъыщIи яхэмыту. Илъэсихт зэрыхъур. Уеблэмэ япэ урокым егъэджакIуэм жиIэм зэфIэту едэIуауэ щытащ, партэм къыдэщыртэкъыми.
Еджэну, и щIэныгъэм хигъэхъуэну, нэхъыбэ зригъэщIэну зи нэ къикIыр щхьэусыгъуэ лъыхъуэркъым. Апхуэдэт ХьэIишэти. Унагъуэм сыт хуэдэ къалэн и пщэ къыщыдэхуэми, абы щхьэкIэ и дерсхэр Iэпэдэгъэлэл ищIыртэкъым. И анэр жьыуэ дэкIа нэужь, зэфIигъэкIын хуейуэ Iуэху зыкъом къыпэплъэрт хъыджэбз цIыкIум. Уеблэмэ, блэкIми-къыблэкIыжми ягъэщIагъуэу, я унэшхуэм сэху къыщрити щыIэт. Апхуэдэу, и егъэджакIуэхэр къыхуэарэзыуэ фIы дыдэу еджащ Ехъутэныджхэ я пхъур. Школым сыт хуэдэ Iуэху къыщрахьэжьэми, жыджэру хэтащ, уеблэмэ я классым и старостэуи щытащ.
Ебланэ классыр къиуха нэужь, Налшык дэт педучилищэм щIэтIысхьащ ХьэIишэт икIи ар ехъулIэныгъэкIэ къиухащ, нэхъыфI дыдэу еджахэм яхэту. Училищэ нэужьым абы и мурадащ, и щIэныгъэм адэкIи хигъэхъуэн хьисэпкIэ, еджапIэ ищхьэм кIуэну, арщхьэкIэ и анэм къыхуидакъым, лажьэмэ нэхъ тэмэму къилъытэри. Арати, уващ Вольнэ Аул дэт 17-нэ школым, пэщIэдзэ классхэр иригъаджэу. ЕгъэджакIуэ ныбжьыщIэм бгъэдэлъ Iуэху зехьэкIэр гъэщIэгъуэнт. Япэ классым къыщIэтIысхьа цIыкIухэм хьэрфхэр щаригъащIэкIэ, тетрадым ит линэм хуэдэ доскам мелкIэ щритхъэрт. А иритхъам хьэрфитI иритхэрти, абы ещхьыркъабзэу я тетрадхэм иратхэну яхуигъэувырт. Урок псом хьэрфитI. ИкIи зи хьэрфхэр къуабэбжьабэхэм яйр тэмэм, я хъэтIыр дахэ хъухункIэ иригъэлIалIэрт.
Сабийр тэмэму еджэн, жыIэдаIуэу щытын папщIэ, школым щыгъэува хабзэхэми тетын зэрыхуейр фIыуэ къыгурыIуати, япэ классыр къыщыIэщIалъхьам щыгъуэ, зы къэмынэу иригъэувэкIри, быдэу яжриIащ: «Мыбдеж фыщыджэгуи, къыщывжыхьи, фызэрымыгъэкIийуэ фыщыпсалъи хъунущ. Ауэ урокым щэху цIыкIуу, фи Iэхэр партэм телъущ фызэрыщIэсынур. Ар быдэу зыгурывгъаIуэ».
«Зы жьэм жьэдыхьэр жьищэм жьэдохьэ» жи. Бзылъхугъэ щIалэм и егъэджэкIэм и хъыбар зэхахат куэдым икIи я быныр абы и классым хагъэтIысхьэну школым лъэIуакIуэ къакIуэр мащIэтэкъым: и Iыхьлыи, и гъунэгъуи, псом хуэмыдэу къулыкъущIэхэрат зи сабий абы и деж нэхъыбэу къэзышэр. Зыпэрыт лэжьыгъэм апхуэдизкIэ хьэщыкъ хуэхъуати, ХьэIишэт и гъащIэр и нэгу къыхущIэгъэхьэртэкъым цIыкIухэм яхэмыту. Абы и зэхуэдэт иригъаджэ дэтхэнэ зыри, и быным хуэдэуи псоми елIалIэрт. КъимыдэкIэ, нэхъыфIу еджэхэм нэхъ хуэмыхуIуэхэр дригъэплъеин папщIэ, къигупсысат мыпхуэдэ Iэмал: блыным къыкIэрилъхьат я цIэ-унэцIэхэр гупищу гуэшауэ зэрыт тхылъымпIэ: япэ гупым фIы дыдэу еджэхэр къыщыгъэлъэгъуат, етIуанэм «щы» зимыIэхэр, ещанэм - нэхъ къыкIэрыхухэр. Зэман дэкIырти, «щыкIэ» еджэхэр нэхъыфIхэм я гупым хэхуэрт, плIы къэзыхьхэр фIы дыдэм я сатырым кIуэрт.
- Москва къикIри, зы гъэ щIэныгъэ Iуэхум телажьэ къэпщытакIуэ гуп къэкIуат республикэм, - жеIэ ХьэIишэт, - ахэр си деж къашэри, урокыр зэрезгъэкIуэкIым щыгъуазэ хуащIащ. ЩыщIэкIыжым «фIы дыдэу ибогъэкIуэкI, гунэс тщыхъуащ» жари къысщытхъуащ. Абы иужькIэ, куэд дэмыкIыу, гъуэгыу си деж къокIуэ адрей пэщIэдзэ классыр зи IэмыщIэ илъ бзылъхугъэр: «Си урокым комиссэр щIэсати, си лэжьэкIэр дыкъуакъуэу къызжаIащ, уэ укъыздэIэпыкъуну арэзы ухъумэ, сагъэлэжьэнущ, арыншамэ сыIуагъэкIыжынущ». - «Ахьей, сыбдэIэпыкъун», - жысIэри зэманыфIкIэ селIэлIащ. А гугъу сызыдехьар, иужькIэ уеблэмэ завуч хъуауэ щытащ. Псапэтэкъэ гузэвэгъуэ зылъэIэсам зыщIэбгъэкъуэну?
И Iуэхур дэкIыу, щытхъу иIэу лажьэми, ХьэIишэт игу зэгъакъым университетым мыкIуэу. Зэрылажьэм хуэдэурэ ари къиухыжащ. Куэд дэмыкIыуи унагъуэ ихьащ. Абы щхьэгъусэ хуэхъуари щIэныгъэлIт, егъэджакIуэхэм я щIэныгъэм щыхагъахъуэ институтым щылажьэ Къанокъуэ Борист.
Къанокъуэ ХьэIишэт курыт школ №17-м щыщыIа 70 гъэхэм хуозэ щIэныгъэ IуэхумкIэ жэуаптакIуэ къулыкъущIэхэм егъэджакIуэхэри ныбжьыщIэхэри еджэн Iуэхум нэхъри куууэ хашэн хьисэпкIэ къызэрагъэпэщу щыта Iуэхугъуэ зэхуэмыдэхэр. Школ къэс пэщIэдзэ класс зырыз къыхашурэ зэпрагъауэрт, сабийхэм я щIэныгъэр здынэсыр къапщытэу. ХьэIишэт и сабийхэр апхуэдэхэм ягъэкIуати, зэм япэ увыпIэр, къыкIэлъыкIуэ зэпеуэм 2-нэ увыпIэр къыхуагъэфэщащ.
А лъэхъэнэм Налшык и санаторэ-хэр здэщыIэ щIыналъэм щаухуат школыщIэ. ЕджапIэщIэм и унафэщIым зэхуишэсырт къалэм щыIэ егъэджакIуэ нэхъыфIхэр. ПэщIэдзэ классыр зыIэщIилъхьэн къилъыхъуэурэ, зы егъэджакIуэ ишэри, игу дыхьакъым, нэгъуэщI зы аргуэру къыхуагъуэтри, ари зыхуейм хуэдэу къыщIэкIакъым. ЩIэупщIэурэ Къа-нокъуэм и цIэфI щызэхихым, телефонкIэ къепсэлъащ икIи и деж иригъэблэгъащ. Зыбжанэрэ къе-лъэIуащ, арщхьэкIэ ХьэIишэт яхутечыртэкъым: игу пыкIыртэкъым мо зэса, фIыуэ илъэгъуа школыр къигъэнэну:
- Си щхьэгъусэм сытригъэгушхуэри, сыкIуауэ щытащ а еджапIэщIэм. Си лэжьэкIэм щыгъуазэ зищIа нэужь, школым и унафэщIыр аргуэру къызэлъэIуащ я деж лэжьапIэ сыувыну. Апхуэдэу щытрагъэчыныхьым сыувауэ щытащ санаторэ школ езанэм.
ЕджапIэщIэм къанэри, илъэс 40-м щIигъукIэ щылэжьащ ХьэIишэт. Щылэжьащ, и IэмыщIэ къихуа дэтхэнэ зыми щIэныгъэфI зэрыбгъэдилъхьэным, гъэсэныгъэ тэмэм зэрагъуэтыным и акъыли, и зэфIэкIи щхьэу-зыхь хуищIу, и щхьэ Iуэхум нэхърэ ар игъэнэхъапэу. И IэнатIэм IэхъуэгъуэтегъэкIыу бгъэдыхьэу есатэкъым ар.
Школ къэзыухахэм, балигъ, унагъуэ хъужахэм и нэхъыбапIэм я япэ егъэджакIуэр зэм-зэм IэфIу ягу къагъэкIыж, дауи. Налшык дэт 27-нэ курыт еджапIэм щылажьэ Тау Элеонори ящыщщ абыхэм.
- Илъэс 40-м щIигъуащ 4-нэ клас-сыр ХьэIишэт къызэрыдигъэухрэ. Телъыджэращи, абы и ныбжьыр илъэс 80-м щIигъуами, егъэлеяуэ гуры-хуэщ, апхуэдиз зэман дэкIа пэтми, дэ тщыщ дэтхэнэ зыри я цIэ-унэцIэкIэ ещIэж, ди адэ-анэхэри щыгъупщакъым. Ар ди анэ етIуанэу фIэкIа дыбжакъым зэи. Фи фIэщ зэрыхъун, абы и макъ зригъэIэтауэ, къэгубжьауэ дрихьэлIакъым - и плъэкIэ къудеймкIэ къатщIэрт къытхуэарэзырэ къытхуэмыарэзырэ, - жеIэ Элеонорэ. - Ди классым щеджа псоми щхьэж и IэнатIэ щагъуэтыжащ гъащIэм. Зы цIыху къытхэкIакъым гъуэгу пхэнж теувауэ. Ар зи фIыщIэр, шэч хэмылъу, ХьэIишэтщ. Дэ, абы иригъэджахэр, дызэклассэгъуауэ зыдбжыркъым - псори зэдэлъхузэшыпхъум хуэдэущ дызэрызэхущытыр, ди егъэджакIуэфIым апхуэдизкIэ дызэкъуигъэуващи. ИтIанэ, гъэщIэгъуэныращи, хъэтI дахэ зимыIэу зыри къытхэткъым. Си щхьэкIэ, сыпсэуху ХьэIишэт згъэгъуэщэнукъым - ар къызэрыдэлIэлIар, абы къытхуищIам и инагъыр псалъэкIэ пхуэмыIуэтэным хуэдизщ.
И IэнатIэм зэрыпэрыувэрэ Къанокъум иригъэджам я бжыгъэр 2600-м щхьэдох. Апхуэдиз сабийм дэтхэнэри бущиин, тетрадхэр, дерс ептахэр къыупщытэн хуейуэ. Ауэ сызыпэрытыр IэнатIэ гугъущ, сезэшащ жиIэу зэи къэдзыхакъыым, къэлэнджакъым. Уеблэмэ школым щымыкIуэ, цIыкIу-хэр щемыджэ, зыгъэпсэхугъуэ махуэхэр фIэкIыхьт, сыту жыпIэмэ абы и лъэр щIэзыгъэкIыр, и гъащIэм къыпызыщэр и псэм щыщ Iыхьэ хъуа школырт, иригъаджэ сабийхэрт. «Мазэ бжыгъэ фIэкIа хъуакъым IэнатIэм сыкъызэрыIукIрэ, итIани зэман куэд дэкIауэ къысщохъу, Iейуэ сахуозэш си сабийхэм».
И IуэхущIафэм къыпэкIуэу къратауэ, ХьэIишэт ехъумэ щIыхь тхылъ зыкъом. Ауэ, ди жагъуэ зэрыхъунщи, щIэныгъэ Iуэхум теухуауэ ди республикэм щыфIащ цIэ лъапIэм хуэдэ иIэкъым. ЩIэблэр гъэсэным, егъэджэным илъэс 65-кIэ къыщIэмыхуэу, пщIэшхуэ иIэу бгъэдэта цIыхубз щыпкъэм «Къэбэрдей-Балъкъэр Республикэм щIыхь зиIэ и егъэджакIуэ» цIэр зэрыхуэфащэм шэч къытезыхьэн абы иригъэджахэми, къыдэлэжьами яхэту фIэщхъугъуейщ.
Сыт нобэ Къанокъуэ (Ехъутэныдж) ХьэIишэт къару къезытыр, и гур зыгъэфIыр, дунейр нэху къыщызы-щIыр? Япэрауэ, езым ещхьу щабэу, цIыхугъэ, адыгэ хабзэ хэлъу ипIа и щIалэ закъуэрщ - Алимщ. КъыкIэлъыкIуэрауэ, и IэмыщIэ илъа и гъэсэнхэм зэращымыгъупщэрщ, къанэ щIагъуэ щымыIэу, балигъ гъащIэм ахэр лъэ быдэкIэ зэрыхэуварщ, и щхьэр лъагэу илъагъуж хъуну, и IуэхущIафэм екIурэ ещхьу зэрыбгъэдэтарщ. Апхуэдэ нэхъыжьыфIхэр лъэпкъым диIэныр фIыгъуэ мылъытэщ.
САУТ СулътIан.