Ди республикэм и «Сыринэ» щIалэгъуалэ гупыр «Театральная завалинка» урысейпсо зэпеуэм къыщыхэжаныкIащ. Абы теухуа хъыбар ди газетым тетащ. Нобэ теддзэр а Iуэху дахэр зи нэгу щIэкIа Къанкъул Раисэ и тхыгъэщ.

Зэхыхьэр щызэхашар Москва областым и Одинцовэ районым хыхьэ Осоргино къуажэм Эсамбаев Мыхьмуд и цIэр зезыхьэу дэт зыгъэпсэхупIэрщ.

         УФ-м и щIыналъэ 46-м я ныбжьыщIэ театр 174-м щыщу «Лесной городок» пансионатым щекIуэкIа фестивалым хэтыну гупыж зыщIахэм къыхахар 12 къудейт.

Ирагъэблэгъахэм, ди гуапэ зэрыхъунщи, яхэхуащ КъБР-м анэдэлъхубзэмрэ щэнхабзэмрэ хъумэнымкIэ и Адыгэ дунейпсо лъэпкъ фондым 2021 гъэм къызэригъэпэща «Сыринэ» щIалэгъуалэ театрри.

Осоргино къуажэм щызэрихьэлIа артист ныбжьыщIэхэр, я гъэсакIуэхэр я гъусэу, къикIат Омск, Сыктывкар, Мышкин, Жуковское, Муром, Пермь, Кемеровэ, Томск, Киров, Раменское, Красноярск, Санкт-Петербург, Одинцовэ, Саратов къалэхэм, нэгъуэщIхэми.

«Сыринэ» гупыр къэрал утыку ихьэнымкIэ лэжьыгъэшхуэ иригъэкIуэкIащ абы и унафэщI, КъБР-м щIалэгъуалэм ядэлэжьэнымкIэ и министерствэм и къудамэм и тхьэмадэ Кугъуэтыж Ахьмэд. НыбжькIэ щIалэми, а цIыху зэпIэзэрытыр, гуащIафIэр сыт и щIыскIи яужь итщ сабийхэм я анэдэлъхубзэр ефIэкIуа зэрыхъуным, лъэпкъым ижькIэрэ къыддекIуэкI хабзэ-бзыпхъэхэр я гъуазэу, хьэл-щэн дахэ зэрызыхалъхьэным.

Фестивалым къикIуа илъэс 30-м къриубыдэу мыбдежым япэ дыдэу лъэпкъыбзэкIэ спектакль щагъэлъэгъуащ. Ди гуапэ зэрыхъущи, ар усакIуэ, драматург, «Горянкэ» газетэм и редактор нэхъыщхьэ Къаныкъуэ Заринэ «КъежэкI» зыфIища и пьесэу «Сыринэ» щIалэгъуалэ гупым ягъэлъэгъуарщ. Режиссёрыр Къанкъул Ислъамщ.

                                      ГукъэкIыж

Дыщынэсам, хьэщIэщ абрагъуэм и бжэIупэм деж щIалэгъуалэ джэгу къыщызэрагъэпэщати, дэри ди адыгэ къафэхэм щыщ тредгъэгъэувэри, къызэхуэсахэр ди лъэ щIэдгъэплъащ. А пщыхьэщхьэм къыщыщIэдзауэ нэгузыужь защIэрэ гъэщIэгъуэну екIуэкIащ махуэхэри жэщхэри. Сабийхэм дэ, анэхэри, дащIыгъуу а щIыпIэм жэщитху-махуихкIэ дыщыIащ. ДызыщIыгъуа гупым ядэтлъэгъуам я гугъу тщIымэ, гугъэ уэзыгъэщIт ди щIалэгъуалэр гъэсэныгъэ дахэ яIэу, лъэпкъ хабзэм и нэщэнэхэр ягъэзащIэу къызэрытэджынумкIэ. НыбжьыщIэхэм я ныбжьыр илъэс пщыкIутху-пщыкIухым иту аращ.

Сыт и лъэныкъуэкIи ди псэр ихьэхуащ къекIуэлIахэм я зэхэтыкIэм, ныбжьыщIэхэм я зыкъэгъэлъэгъуэкIэм. Махуэ къэс жыхуаIэм хуэдэу, пщэдджыжьым сыхьэти 9-м дызыщIэс пэшым дыкъыщIэкIырти, япэщIыкIэ пщэдджыжьышхэ дыкIуэрт, абы иужькIэ спектаклхэр щагъэлъагъуэ утыкушхуэм дашэрти, къыщекIуэкIхэм драгъэплъырт.

         Шэджэгъуашхуэ нэужьым тIэкIу зыдагъэгъэпсэхужырти, театр теплъэгъуэхэм пыдагъэщэжырт. Пщыхьэщхьашхэр зэрызэфIэкIыу, аргуэру спектаклхэр щагъэлъагъуэ клубым дыкIуэрт.

Апхуэдэ щыIэкIэ-лэжьэкIэм махуэ псор тегъэпсыхьат. Дезыгъэблэгъахэм я ерыскъыр IэфIт, шхыныгъуэхэр зэмылIэужьыгъуэт, Iэнэр «шведскэ» жыхуаIэм хуэдэти дызыхуейм хуэдиз къатщтэрт, IуэхутхьэбзащIэхэр нэфIэгуфIэ защIэт.

БжьыхьэкIэ дыгъэр мыгуащIэу псэм ехуэбылIэрт, гум едэхащIэрт. ЗыгъэпсэхупIэм и Iэгъуэблагъэр узыIэпызышэу дахащэт – мэзхэмкIэ, псыхэмкIэ къэухъуреихьауэ. Дызыхэт Iуэхури апхуэдизу удэзыхьэхти, кIуэжыгъуэр къыщысам, сабийхэр зэбгрыкIыжыну хуейтэкъым.

ЖыпIэнур арамэ, махуэри жэщри нэгузыужьт, гуимыкIыжт. Къаныкъуэ Заринэ и пьесэр фестивалым и жюрим хэтхэми гъэщIэгъуэныщэ ящыхъуащ. Спектаклыр екIурэ-ещхьу зэхэгъэувэнымкIэ лъэкI къэзымыгъэна режиссёр Iэзэ Къанкъул Ислъам ФIыщIэ тхылъ къыхуагъэфэщащ, щIалэгъуалэм хэкупсэ гъэсэныгъэ ябгъэдэлъхьэным хуэгъэзауэ зэфIигъэкIа лэжьыгъэм папщIэ.  

«Театральная завалинка» Iуэхур ягъэзащIэ УФ-м и Президентым и унафэкIэ щэнхабзэмкIэ жэрдэмхэм хухаха ахъшэр къагъэсэбэпкIэрэ.   

Зэхьэзэхуэм кърикIуахэм япкъ иткIэ, «Сыринэ» щIалэгъуалэ театрым къыхуагъэфэщащ дипломхэу япэ нагъыщэ зиIэмрэ «Анэдэлъхубзэр зэрахъумэм папщIэ» зи фIэщыгъэмрэ.

КЪАНКЪУЛ Раисэ.