ГъуазджэхэмкIэ Кавказ Ищхъэрэ къэрал институтым креативнэ практикэхэмкIэ и «Арт-Идея» центрым и студием щекIуэкIащ «Я горжусь. Герои» урысейпсо Iуэхум хыхьэ зэIущIэ. Ар студент патриот клубхэм я зэгухьэныгъэм и жэрдэмкIэ ящIэ Iуэхущ, УФ-м ЩIэныгъэмрэ егъэджэныгъэмкIэ и министерствэр и дэIэпыкъуэгъуу. Зэхыхьэм ирагъэблэгъащ РСФСР-м и цIыхубэ артисткэ, КъБР-м щIыхь зиIэ и артисткэ, и Къэрал саугъэтым и лауреат, профессор, институтым уэрэд жыIэн гъуазджэмрэ дирижированиемкIэ и кафедрэм и унафэщI Гъэсашэ Наталье.
Iуэхур къыхэзылъхьахэм къалэну зыхуагъэувыжыр лъэпкъ гупсысэр гъэбыдэнырщ, щIалэгъуалэм я зэхуаку лъытэныгъэ дэлъхьэнырщ, къэралым и ехъулIэныгъэм иригушхуэу, Урысейм щыпсэу лъэпкъхэм я щэнхабзэмрэ хабзэхэмрэ пщIэ хуащIу къэгъэхъунырщ.
Гъэсашэ Наталье студентхэм къыхаха IэщIагъэм и щэхухэм хигъэгъуазэ, щIэныгъэ унафэщI къудей мыхъуу, лъэныкъуэ куэдкIэ щапхъэ яхуохъу. Илъэс щэ ныкъуэм щIигъуауэ зи IэнатIэм жэуаплыныгъэ ин пылъу, гу къабзэрэ псэ хьэлэлкIэ бгъэдэт егъэджакIуэр дэтхэнэ и зы гъэсэнми и зэфIэкIхэр къызэкъуихынымкIэ, зригъэужьынымкIэ доIэпыкъу. Гъэсашэм къыхигъэщащ зэрыцIыкIурэ макъамэм гу зэрыхуищIар, еджэныр курыт еджапIэм фIыуэ къыщехъулIэми, псом хуэмыдэу есэпымрэ инджылызыбзэмрэ зэфIэкI щиIэми, щэнхабзэр къызэрыхихар. Артисткэр студентхэм ядэгуэшащ Европэм, Азием, Африкэм, Канадэм, Америкэм и Штат Зэгуэтхэм концертхэр зэрыщитам теухуа и гукъэкIыжхэмкIэ. ЮНЕСКО-м къыбгъэдэкI дыжьын медалыр Париж къызэрыщратыжар къыщыгъэлъэгъуа сурэтым еплъащ щIалэгъуалэр.
Куэд зытхьэкъуа макъ зиIэ, зыхилъхьэ щымыIэу зи лэжьыгъэр фIыуэ зылъагъу бзылъхугъэм Къэбэрдей-Балъкъэрым и музыкэ щэнхабзэмрэ гъуазджэмрэ хуищIа хэлъхьэныгъэхэр къэлъытэгъуейщ. Ди щIыналъэм къищынэмыщIауэ, дуней псом щIэупщIэхэр щиIэу, Iэгуауэрэ удз гъэгъакIэ гъэнщIа концертхэр щызыта Наталье нэгъуэщI щIыпIэхэми щыцIэрыIуэщ, пщIэи къыщыхуащI. Лъэпкъ гъуазджэм и гуащэу къалъытэ бзылъхугъэм IуэхущIафэ куэдкIэ гъэнщIауэ щытащ и гъуэгуанэр. Ар щыIащ Мароккэм, Алжирым, Тунисым, Ливием, КъуэкIыпIэ, Курыт Африкэм и къэралыгъуэхэм, Иорданием, нэгъуэщI щIыналъэхэм. Гъэсашэм дунейр къыщызэхикIухьар зэман ткIийт: къэралым икIыну хуитыр зырызт, апхуэдэхэри гугъу ирагъэхьырт - зы мэскъалкIэ шэч къытрахьэмэ, я нэхъ мащIэрамэ, я гъуэгур зэхуащIынут.
- Зыкъыщыдгъэлъэгъуэну дызрагъэблагъэ къэралхэм я лъэпкъ уэрэдыжь къэзгъуэту я бзэкIэ зэрызгъэзэщIэным сыхущIэкъурт сыт щыгъуи. Ар Iуэху тыншу схужыIэнукъым, ауэ бысымыр абы зэрыщыгуфIыкIынур сщIэрти, гугъуехьри къысфIэIуэхутэкъым, - игу къегъэкIыж Наталье. - УэрэджыIакIуэм лъэпкъым хуищI пщIэр къызэригъэлъагъуэ IэмалыфIщ ар. Уэрэдыр къэплъыхъуэу къэбгъуэтыныр Iуэхутэкъым, зэбгъэщIэнырт нэхъ хьэлъэр. Африкэм лъэпкъ зэмылIэужьыгъуэ куэд зэрыщыпсэум къыхэкIыу, ар нэхъ хьэлъэт, ауэ, дауэ хъуми, зэзгъэхъулIэрт.
Адыгэ, урыс, хамэ къэрал композиторхэм я оперэхэм щыщ ариехэр, уэрэдхэр – куэд мэхъу Наталье игъэзащIэр. КъызэралъытэмкIэ, абы къехъулIащ Верди Джузеппе и «Травиата», «Риголетто», «Сицилийская вечерня» оперэхэр, Кальман, Штраус, Легар, Оффенбах, нэгъуэщIхэм я опереттэхэм щыщ арие цIэрыIуэхэр. Зи зэфIэкIым хэзыгъахъуэу къекIуэкIа, зыми хэмыгъуащэ уэрэд гъэзэщIэкIэ гукъинэж зиIэ Гъэсашэм и лэжьыгъэм куууэ зэрыхищIыкIым щыхьэт тохъуэ уэрэджыIакIуэхэм я зэпеуэхэмрэ фестивалхэмрэ иригъэкIуэкIыну е къэпщытакIуэ гупым я унафэщIу щIыналъэ, дунейпсо гъуазджэ зэхыхьэ гуапэхэм зэрырагъэблагъэр, ахэр и цIэкIэ къызэрызэрагъэпэщыр. Апхуэдэхэщ «Молодые голоса Кавказа», «Конкурс военно-патриотической песни», «Звездопад», «Орфей», «Виртуозы XXI века» зэпеуэхэр, нэгъуэщIхэри.
Налшык къалэ округым и ЦIыхубзхэм я советми хэтщ Гъэсашэр. УримыгушхуэнкIэ Iэмал иIэкъым а зэгухьэныгъэм кърихьэжьэ Iуэхухэм уэрэджыIакIуэ цIэрыIуэр жыджэру зэрыхэтым. Псом хуэмыдэу, Наталье хэлъхьэныгъэфI хуищIащ «Глобализация. Женщина. Связь поколений» проектым, республикэм пщIэрэ щIыхьрэ щызиIэ бзылъхугъэхэм я чэнджэщхэм щIалэгъуалэр щыщIагъэдэIум.
Гъэсашэр щапхъэщ и Iыхьлыхэм, благъэхэм, лэжьэгъухэм я дежкIи гъащIэр фIыуэ зэрилъагъумкIэ, хьэл-щэн дахэхэр зэрыхэлъымкIэ, сыт щыгъуи гушыIэ дахэрэ гукъыдэжрэ зэрыдалъагъумкIэ. Наталье и ныбжьэгъу, лэжьэгъу куэдым къыхагъэщ ар зыпэрыхьэ дэтхэнэ Iуэхугъуэри къызыхуэтыншэу зэрызэфIихыр, хьэщIэ фIыуэ зылъагъу унэгуащэ гуапэу зэрыщытыр.
КъБР-м и музыкэ гъуазджэмрэ щэнхабзэмрэ Гъэсашэ Наталье хуищIа хэлъхьэныгъэхэр къалъытащ. Абы мызэ-мытIэу къыхуагъэфэщащ КъБР-м и Парламентымрэ Правительствэмрэ я щIыхь тхылъхэр, Дунейпсо Адыгэ Хасэм и медалыр, Дунейпсо Арт комитетым и «Человек-легенда» щIыхьыцIэр.
- Нэхъыщхьэр умыщхьэхынырщ. Абы щыгъуэ къаруи уиIэнущ, къэкIуэнури уи фIэщ хъунущ, уи хъуэпсапIэхэри зэбгъэхъулIэфынущ. Зэпымыууэ къалэныщIэхэр зыхуэбгъэувыжын хуейщ, - студентхэм чэнджэщ яритащ Гъэсашэм.
ЗэIущIэм студентхэм Iэмал яритащ цIыхубэ артисткэм и гъащIэмрэ гуащIэмрэ теухуауэ щIэ куэд къащIэну, упщIэхэр иратыну, зэманыр гукъинэжу ягъэкIуэну.
ТЕКIУЖЬ Заретэ.
