Къэрал, политикэ лэжьакIуэ цIэрыIуэ Мэлбахъуэ Тимборэ къыщалъхуа махуэм ирихьэлIэу абы и цIэр зезыхьэ Лъэпкъ къэрал библиотекэм фэеплъ пшыхь щекIуэкIащ. 

ЗэIущIэм хэтащ КъБР-м исхэм я хуиты­ныгъэр хъумэнымкIэ уполномоченнэ Зумакулов Борис, КъБР-м и Парламентым и депутат, КПРФ-м и щIыналъэ къудамэм и япэ секретарь Пащты Борис, КъБР-м и Парламентым и депутат Кебеков Владимир, нэгъуэщIхэри.
Библиотекэм и лэжьакIуэхэм «Имя - как при­мета эпохи» тхылъ дапхъэ ягъэхьэзыращ, лъэпкъым и къуэ щэджащэм и гъащIэмрэ и гуащIэмрэ теухуауэ. 
Пшыхьыр къызэIуихащ икIи иригъэ­кIуэ­кIащ библиотекэм и унафэщI, филологие щIэныгъэхэмкIэ доктор, профессор, КъБР-м щIэныгъэхэмкIэ, щэнхабзэмкIэ щIыхь зиIэ и лэжьакIуэ Емуз Анатолэ. Абы и псалъэм къыхигъэщащ Мэлбахъуэ Тимборэ и уна-фэм ущIэту улэжьэным зы лъэныкъуэкIэ пщIэрэ щIыхьрэ пылъами, тыншу зэрыщы­мытар, и лэжьэгъухэми и щхьэми къалэн  инхэр яхуигъэуву къызэрекIуэкIам къыхэ­кIыу. 
- Къэрал лэжьакIуэ нэхъ цIэрыIуэхэм ящыщу щытащ Мэлбахъуэр. Лъэпкъым къыде­кIуэкI хабзэ дахэхэр, нэхъыжьыфIхэм къытхуагъэна хьэл-щэн нэхъыфIхэр дэплъагъурт а цIыху акъылыфIэм. Къэбэрдей-Балъкъэрым и унафэщIым хузэфIэкIырт щIыналъэм щыпсэу лъэпкъ псори зэкъуигъэувэну. Ар шыIэныгъэ зыхэлът, къулыкъушхуэ иIыгъми, пагэтэкъым. Абы и щхьэ, и унагъуэ IуэхукIэ къыхуей хъуахэр Мэлбахъуэм хуэзэфынут. Аращ егъэлеяуэ пщIэ хуащIу щIыщытари, - жиIащ Емузым. - ЩIэнгъуазэ щIэныгъэ ­зыбгъэдэлъ Мэлбахъуэм и щIалэгъуэм щы­щIэдзауэ тхылъ зэхуихьэсащ. Абыхэм ящыщ куэд библиотекэм тыгъэ къыхуищIыжащ   ипхъу Ольгэ. Абы щылэжьа нэ­хъыжьхэм зэрыжаIэжымкIэ, Мэлбахъуэр я IуэхущIапIэм къэкIуэрейт икIи тхылъхэр ­хуэсакъыу зэрихьэрт. Классикэ теплъэ зиIэ библиотекэ нэхъыщхьэр абы и щIэинщ. 2007 гъэм щыщIэдзауэ Мэлбахъуэ Тимборэ и цIэр зэрехьэ республикэм и библиотекэ иным.
Зумакулов Борис Мэлбахъуэ Тимборэ и дуней тетыкIар игу къыщигъэкIыжым, и псалъэм къыхигъэщащ япэщIыкIэ Хэкум, иужь­кIэ и щхьэм егупсысхэм ящыщу ар зэры­щы­тар. 
- Мэлбахъуэ Тимборэ и гъащIэмрэ и гуа­щIэмрэ, псэемыблэжу къэралым къулыкъу зэрыхуищIар, и унафэм щIэта республикэр сыт и лъэныкъуэкIи зэрыригъэфIэкIуар щIалэгъуалэм я дежкIэ щапхъэфIщ, - жиIащ Пащты Борис. 
ТЕКIУЖЬ Заретэ.