Бу кюнледе КъМР-ни Жарыкъландырыу эмда илму министерствосунда «Мен россейлиме!» деген регион проектге жораланнган жыйылыу болгъанды. Анга  КъМР-ни жарыкъландырыу эмда илму министри Анзор Езаов бла жаш тёлюню ишлери жаны  бла  министр Азамат Люев къатышхандыла.

Проект ёсюп келген тёлюню патриот ниетде юйретиуге, Ата журтха, аны тарыхына, маданиятына бла адет-тёрелерине сюймеклик эмда кертичилик сезимлени къозгъар мурат бла жарашдырылгъанды. Кеси да быйыл ноябрьден башлап 2024 жылны февраль айына дери бардырыллыкъды. Ол кезиуню ичинде волонтёр къауумла маданиятха жораланнган эришиуле къурарыкъдыла, видеороликле жарашдырлыкъдыла, хапарла жазарыкъдыла. Аладан сора да, республиканы айнытыу жаны бла «Келир заманны фабрикасы» деген конкурс эмда «Россейни кючю» деген ат бла аскер-спорт оюнла да ётерикдиле.
Регион проектге школчула, энчи орта билим ала тургъан жаш адамла эмда бийик окъуу юйлени студентлери, жаш алимле да къатышыргъа боллукъдула.

Холаланы Марзият.