Къабарты Малкъар къырал университетде Отарланы Керим атлы малкъар маданият ара кёп магъаналы проектле бардыргъанлай турады. Бу кюнледе уа КъМР-ни Жаш тёлю ишлери жаны бла министерствосуну себеплиги бла Къырал концерт залда «КВН юниор-лига» фестиваль болгъанды. Бу жумушха Жангы Малкъар, Хабаз, Тырныаууз, Элбрус, дагъыда Кёнделенни биринчи эм тёртюнчю школларыны окъуучулары тири къатышхандыла. Аны себепли эришиуге къошулгъан алты команда болгъанды.
Тюбешиуню аллында КъМР-ни жаш тёлюню ишлери жаны бла министрини орунбасары Ахметланы Артур келгенлеге ыразылыгъын билдиргенди. Бу проект эм алгъа жаш адамланы ана тилге сюймекликлерин ёсдюрюр ючюн къуралгъанын белгилегенди. «Бизни миллетде не заманда да чам кесини энчи жерин алып тургъанды, бюгюнлюкде уа аны хайыры бла жаш адамла байламлыкъ жюрютюрча да амал барды. Кеслерин сахнада сынайдыла, ана тилде да иги сёлеширге юйренедиле», – дегенди ол. Бу ахшы жумушну мындан ары да бардырып, башха тау эллени школчуларын да тири къошаргъа умутлу болгъанларын да чертгенди.
Эришиу эки кезиуден къуралгъанды, биринчисинде командала кеслерин танытыргъа керек эдиле. Аны себепли сабийле жыргъа, тепсеуге, назмула жазаргъа да усталыкъларын баям этгендиле. Хар команда да белгили жырланы макъамларына кеслери чам халда сёзле къурап къууандыргъандыла. Кёнделенни биринчи школуну окъуучуларын а энчи белгилерчады, ала «Озай» деген миллет жыргъа аламат сёзле жазгъандыла. Жамычы кийип сахнагъа чыкъгъан жашчыкъ ол жырны айтхан кезиуюнде, башхалары анга аламат тепсегендиле. Элбрусдан келген къауум да «Минги тау» макъамгъа чам назму салып кеслерин танытхандыла. Жангы Малкъарны командасындан ариу ёнлю Элеккуланы Мурат да «Салам санга таулу халкъым» деген жырны хар адамны да кёлюн жарытырча аламат айтханды. Алай бла биринчи тургъа барысы да иги хазырланып, сейир номерле къурагъанларын баям этгендиле.
Экинчи бёлюмде уа командалагъа «юй иш» берилген эди. Анда ала кеслери сюйген темагъа оюнла, чамла къураргъа керек эдиле. Бу жумушда да хар бири да бу усталыкъда фахмулу болгъанларын туура этгендиле. Ала школда тюбеген болумланы, мультфильмлени, адамны жашауунда тюбеген ишлени, жангы техниканы юслеринден да кёп кюлкюлю затла кёргюзтгендиле. Элбрусну къаууму уа орус жомакъдагъы «Колобок» бюгюн жашаса къаллай боллугъу бла байламлы аламат номер салгъандыла. Кесин да амма интернетде рецептле бла хайырланып биширгенди, аны ючюн ол бусагъатдагъы жаш тёлюча сёлешип, жаныуарланы элгендире эди.
КъМКъУ-да малкъар маданият араны таматасы Кулчаланы Жамиля эришиуню боллугъун школлагъа бир ай мындан алгъа билдиргенин айтханды. Кёпле анга къууанып, конкурсха къатышыргъа ыразылыкъларын билдирип, хазырланып башлагъан эдиле. Сабийле кёллерин салып, тири кюрешгенлерини эсеплери уа бюгюн баям болгъанды, деп чертгенди.
Сабийлени оюнларына багъа бичген жюрини санына филология илмуланы кандидатлары Гелястанланы Танзиля, Шауаланы Ольга, «Минги-Тау» журналны редактору Бёзюланы Асият эм КъМР-ни сыйлы журналисти Шауаланы Разият киргендиле.
– Бюгюн бери келгенле барыбызда зауукълукъ тапдыкъ. Бу къыйын заманлада адам кесини миллетини энчилигин да унутмагъанлай, анга да эс бурургъа керекди. Бюгюн усталыкъларын кёргюзтген сабийле уа, барыбызны да кёлюбюзню жарытдыла, жарсыуларыбызны чачдыла. Аны ючюн хар биригизге да жюрек ыразылыгъымы айтама, быллай хунерли жаш адамларыбыз да аслам болгъаны, тилибизде шатык сёлешгенлери бек къууандыргъанды. Бу иш мындан ары да бардырылып, башха эллени сабийлери да къошулурла деп бек ышанама, – дегенди Разият.
Ызы бла келген школчулагъа ыспас этип, алчы болгъан къомандаланы айтхандыла. Ючюнчю жерни Кёнделенни тёртюнчю школуна, экинчини жангы малкъарлылагъа, эм биринчини уа Кёнделлени биринчи школуну окъуучуларына бергендиле, ала кубоклагъа тийишли болгъандыла. Башха къауумланы да иги хазырланнганлары ючюн энчи саугъала бла къууандыргъандыла. Фестивальны уа аламат той бла жапхандыла.
Темуккуланы Амина.