Уллайгъанлагъа жораланнган айлыкъ бошалды. Анга да къарамай, чачларын заман агъартхан, кёпню кёрген эмда билген таматала унутулуп къаллыкъ тюйюлдюле. Анга тиширыуланы шахар советини уллайгъанлагъа энчи эс бургъаны да шагъатлыкъ этеди. Анга кирген къауум къартла бла сакъатла тургъан юйлени терк-терк жокълайдыла, тюрлю-тюрлю тюбешиуле, жандауурлукъ акцияла къурайдыла. Сабийлени да унутмайдыла, артыкъда къыяулары болгъанлагъа энчи къайгъырадыла, юйюр тёреле сакъланырларына да себеплик этедиле.
Бу кюнледе да тиширыуланы биригиую Искож тийреледе сабий чыгармачылыкъны «Эрудит» арада «Юйюр хазналаны сакълай, келир заманны къоруулайбыз» деген ат бла тюбешиу къурагъанды. Анга кёп жылланы жууаплы къуллукълада, ишледе, илмуда урунуп, жетишимлери, фахмулукълары бла белгили болгъанла чакъырылгъандыла.
Аланы тиширыуланы советини таматасы Лидия Дигешева Нальчик шахар администрацияны башчысы Таймураз Ахоховну атындан алгъышлагъанды. Ызы бла жыл санлары келген адамлагъа жораланнган байрамны тарыхыны юсюнден да айтханды. «Бюгюн бери келгенлени сабий заманлары уруш, кёчгюнчюлюк, ачлыкъ, жаланнгачлыкъ жыллагъа тюшгенди. Анга да къарамай, сиз таза ниетли болуп ёсгенсиз, къол къыйыныгъыз, билимигиз бла къыралгъа хайыр келтиргенсиз эмда келтиресиз, сабийле ёсдюргенсиз, энди уа туудукълагъа да къарайсыз, аны ючюн сизге жюрегимден ыспас этеме». – дегенди.
Лидия Дигешева «Абаданланы хурметлеген, кесини намысын кётюреди» деген нарт сёзню да эсге салгъанды. «Жаш адамла бу акъыллы сёзлеге кертичи болурларын бек сюеме. Нек дегенде тёлюден-тёлюге къала келген ахшы адет-тёрелерибиз, кичини абаданнга намыс этиую, жюрютюлюрге, ёмюрлеге сакъланыргъа керекдиле. Алайсыз, бизни миллетле сакъланырыкъ тюйюлдюле», – деп къошханды.
«Россейни урунуу махтаулугъу» битеуроссей жамауат биригиуню регион бёлюмюню таматасы Леонид Бондарев а сёзюн аналагъа жоралагъанды. «Дунияны башында анадан багъалы жокъду. Ма мында да жамауатха жараулу сабийле ёсдюрген огъурлу анала олтурадыла. Сиз да сабийле ёсдюрюп, энди уа аладан туугъанлагъа да кёз-къулакъ боласыз. Мен билеме, сиз ала ючюн жашайсыз. Ма былай саулугъугъуз, эслигигиз, тирилигиз бла да энтта кёп жылланы жашагъыз. Бюгюн шахарны орамларындан биринде бара, бир машинаны мияласында быллай сёзлени окъугъанма: «Бек бай адам анасы, атасы да болгъан адамды». Ол керти да алайды. Алай сиз да барыгъыз да байсыз – кесигизни жашау хазнагъыз, ариу сабийлеригиз бла»,– дегенди Леонид Николаевич.
Андан сора Лидия Дигешева сыйлы къонакъланы хар бирини юсюнден да хапар айтханды. Аланы араларында уа алимле, юристле, устазла, предпринимательле, лаборантла, сатыу-алыуда кёп жылланы ишлегенле, журналистле, жамауат къуллукъчула, алгъыннгы комсомолчула, аскерчиле, спортчула, инженерле, врачла, темир жолчула, башхала да бар эдиле.
Ахырында «Эрудитни» директору Залина Кагермазова бу байрамны къураугъа себеплик этгенлеге жюрек ыразылыгъын билдиргенди, КъМР-ни Башчысыны экономика жаны бла кенгешчиси Уяналаны Аминатха, предпринимательле Гетежева Розагъа, Лидия Анчоковагъа, Чеккеланы Рахимагъа, КъМР-ни сыйлы артисти Ирина Дауровагъа, журналист Ирина Садовниковагъа да энчи ыспас этгенди.
КъМР-ни сыйлы артисткасы Ирина Даурова бла аны сохталары уа къууанчха къууат салгъандыла.
Холаланы Марзият.